Mialnea Stones pabiling way pilde sa LLBA Friendship Cup

CEBU, Philippines - Nagpabiling walay pilde ang Mialnea Stones human miugkat og daog batok sa Daniela's Internet Café, 60-50 sa nagpadayong 1st Villas Magallanes League nga ulohan og "LLBA Friendship Cup 2009" didto sa Villas Magallanes gym sa Sta. Lucia Properties sa Basak, Lapu-Lapu City.

Ang Mialnea Stones ni commissioner Alan Yu nga temporaryong nag-una sa liderato bitbit ang 3-0 nga baraha, maoy nidominar sa kinatibuk-ang duwa ug nilabaw kini og otso puntos sa halftime, 39-31.

Misuway og gukod ang Daniela's Internet Café sa giya ni Erne Giganto sa third quarter, apan wala kini makasugakod tungod sa walay puas nga depensa nga gipatuman ni Digoy Patalinghug hangtod nga nahurot ang oras sa duwa.

Si Sener Soroño maoy topscorer sa Mialnea Stones nga miugbok og 14 puntos, gisundan ni Yu sa iyang 12 puntos, lakip na ang tulo ka triples, samtang si Patalinghug mitipak lang og kuwatro puntos alang sa maong kadaugan.

Walay bisan usa ka magduduwa ang mikulit og double figures alang sa naparot nga Daniela's Internet Café, kinsa gipangulohan ni Giganto nga igo lang mikulit og otso puntos. Si team manager Billy Nadado uban nilang JunJun Eroles ug Eddie Bontes miamot og sayes puntos matag usa alang sa Daniela's Internet Café, kinsa nakatilaw sa ilang ikaduhang sunod-sunod nga kapildihan sud sa tulo ka duwa.

Sa laing bahin, ang Yan C Rico milansang sa ilang ikaduhang sunod-sunod nga daog pinaagi sa paglubong sa dinaog-daog nga NMC VKK Scuba Divers, 65-42.

Sa gihapon, si LLBA president Alan Sepe mao na sab ang nangulo sa Yan C Rico nga mi-iskor og 21 puntos. Sila si Ondo Cadungog, Medina ug Ochea parehong mirehistro og siyete puntos alang sa Yan C Rico nga nagbitbit og 2-1 nga baraha, samtang si Bardago, kinsa miposa og 14 puntos mao sab ang nangulo sa NMC VKK ni team owner Martinito Villamor nga nahimutang sa kinailawmang bahin sa standing sa ilang 3-0 win-loss record.

Mikulit sab sa ilang ikaduhang daog ang Smart Titans pinaagi gihapon sa paglubong sa John Videoke sa iskor nga 71-54.

Ang Smart Titans ni Dr. Michael Ouano ug Dr. Ceniza nagtangag og 2-1 win-loss record, samtang ang John Videoke ni team owner Lito Magat nagbitbit og 1-2 nga baraha.

Ang LLBA Friendship Cup 2009 gipaluyohan sa Overseas Courier Service Inc. (OCS), Boy Castrueras sa Tambuli Beach Resort, King Celes sa Boylen Marketing, COMFA General Merchandise, PEBA, 13R Motor Parts, Ginn Pharmacy, Atty. Rico Amores, Purcia Transport, Junjun Eroles sa Cebu Nisico Corp., Guns Agrivet, PLDT supervisor Joselito dela Peña, LL&MB Shell Craft, TJ Sports ug Westland Funeral Homes.

Gisuportahan sab kini ni Hon. Mayor Arturo Radaza, Brgy. Capt. Paz Radaza, Brgy. Capt. Lauro Soroño ug Vic Radaza.

Puntos Matag Usa

Unang duwa:

YAN C RICO (65) - Sepe 1, Medina 7, Cadungog 7, Ochea 4, Ybañez 6, Lapoja 6, Celiz 5, Degolacion 4, Cosep 2

NMC VKK (42) - Bardago 14, Ferater 10, Orque 8, Malingin 5, Romero 5, Odiada 5, Aselom 2

Ikaduhang duwa:

MIALNEA (60) - Soroño 14, Yu 12, Bentazal 8, Llenes 8, Ybañez 7, Temporada 5, Patalinghug 4, Igot 3, Daluz 2

DANIELA'S (50) - Giganto 8, Bontes 6, Nadado 6, Eroles 6, Augusto 5, Coming 4, Bensi 4, Amodia 4, Portugaliza 4

Ikatulong duwa:

TITANS (71) - Ouano 15, Aris 14, Ramos 9, Lamoste 8, Bancale 6, Labrada 6, Adlit 4, Impas 4, Villaflor 3, Gutib 2

JOHN VIDEOKE (54) - Ngujo 12, Magat 10, Dignos 8, Villamor 8, Lungay 6, Cantila 4, Simbajon 2, Fausto 2, Fuentes 2. – BANAT NEWS