Kings, Beermen magtiwas karon alang sa korona
CEBU, Philippines – Napugngan ang giplanong selebrasyon sa Barangay Ginebra Kings dihang mibawos ang ilang igsuong koponan San Miguel Beermen, 98-84 sa Game-6 sa ilang “best-of-seven” finals series didto sa Araneta Coliseum.
Namawi si Gabe Freeman gikan sa iyang bati nga performance sa miaging duwa pinaagi sa pagposa og 24 puntos aron pangulohan ang Beermen, kinsa mihatod sa serye ngadto sa tinaktakay nga Game-7 nga duwaon karong alas-7 sa gabii.
Ang best import of the conference nga si Freeman milupig sa iyang karibal nga si David Noel, kinsa igo lang mihipos og 16 puntos nga layo ra sa iyang 29 puntos sa Game-5.
Nanghinaot si coach Siot Tanquincen nga magpabilin unta ang ilang maayong duwa sa iyang mga batos ilabi na sa outside shooting nga mao unya ang himuon nilang lig-ong hinagiban karong gabii.
Sila si Danny Ildefonso, Mike Cortez ug ang Sugbuanong si Dondon Hontiveros, maoy tahasan ni coach Tanquincen alang sa opensa.
Sa ilang bahin, ang Kings anaa karon sa krusyal nga sitwasyon tungod kay anaa sa Beermen ang momentum, apan malaumon si coach Jong Uichico nga mahibalik ang kalagsik sa iyang magduduwa aron hingpit na nilang masakmit ang ikasiyam nilang titulo.
Si Noel gipaabot nga abagan nilang Eric Menk, Ronald Tubid ug Jayjay Helterbrand. – BANAT NEWS
- Latest
- Trending
