Dark team midaog sa FYA All-Star Game

CEBU, Philippines – Ang idlas ug dangog kaayong pointguard nga si Dondon Cadungog mi-iskor og 11 puntos sa nahabiling tres minutos sa duwa aron hatagan ang Dark All-Star og 104-99 nga kadaugan batok sa Light All-Star sa tinuig nga F. Llamas Youth Association (FYA) All-Star Game niadtong miaging gabii didto sa Vicente Sotto Memorial Gym sa barangay Punta Princesa, ning dakbayan.

Ang All-Star MVP nga si Cadungog, maoy nangu sa Dark team pinaagi sa iyang 16 puntos.

Sikit kaayo ang aksiyon gikan sa pagsugod ug nagpuli-puli kini og ilog sa labaw hangtod nga si Cadungog mipasulod sa iyang duha ka free throws aron pagselyado sa kadaugan.

Si Ryan Villaver mi-iskor og 12 puntos, sila si Daniel Enriquez ug Wendell Rollon parehong mikulit og 11 puntos alang sa Dark. Sila si Chrissar Llegunas ug Rovel Tabar miabuno og 10 puntos matag usa.

Si Tito Bacarisas mao sab ang nangu sa Light All-Star sa iyang 17 puntos, gisundan ni Ranel Patalita nga adunay 16 puntos.

Sa laing bahin, si Eking Marata sa Rollyr Boyz maoy kampiyon sa buzzer-beater contest, samtang si Michael Garcia sa Aqua Serv maoy giilang three-point king. 

Ang knockout finals sa FYA tali sa Rollyr Boyz ni Punta Princesa barangay captain Rolly Diorico ug Kuya Allan ni Allan Guibelondo himuon karong gabii.

Ang FYA gipaluyohan ni barangay councilor Ray Gabriel Salgado ug tournament director Boy Atillo.

Puntos Matag Usa

Dark All-Star (104) - Cadungog 16, Villaver 12, Enriquez 11, Rollon 11, Tabar 10, Llegunas 10, Bas 6, Caballero 6, Basalo 4, Dacayana 4, Del Mar 2, Camacho 2, Rama 2

Light All-Star (99) - Bacarisas 17, Patalita 16, N. Laborte 11, Limbaga 9, Canceko 7, Navarro 7, T. Laborte 6, Abellana 6, Medalle 4, Cabigas 4, Reubal 2, Cal 2 – BANAT NEWS