CEBU, Philippines – Pormal nga buksan karong adlawa ang 3rd Mayor Sun J. Shimura Basketball Cup 2009 didto sa Daanbantayan Cultural Center sa Daanbantayan, Cebu.
Miabot sa 39 ka teams ang mag-ilog sa korona sa inter-school, inter-barangay ug inter-agency category.
Sa 20 ka barangay, 18 lang ka teams ang moapil sa liga, samtang 12 ka pribado ug pangpublikong tunghaan ang magsambunot sa inter-school ug siyam sa inter-agency category.
Si Shimura ang pormal nga mobukas sa liga human sa parade libot sa barangay Poblacion, Daanbantayan.
Human sa parada, isunod dayon ang pagpili sa Miss Mayor’s Cup 2009.
Gipahibalo ni Shimura nga mas dagku ang premyo karong tuiga itandi sa nangaging katuigan.
Ang makampiyon makigduwa sa mga artista alang sa All-Stars basketball exhibition games sa Agosto 25, 2009.
Ang liga usa sa mga dagkung kalihukan alang sa Haladaya Festival karong Agosto 30.
– BANAT NEWS