Sanchez midaog sa 8th stage sa Tour de France

CEBU, Philippines - Si Luis Leon Sanchez sa Spain maoy midaog sa eight stage sa Tour de France pinaagi sa paggukod sa mga nag-unang kauban nga may gilay-ong 176.5 ka kilometro sa may Andorra ug St. Girons sa France kaniadtong Sabado.

Si Sanchez kinsa usa sa mga maayong riders sa ilang grupo, mihunat og maayo aron makagukod ug pildehon ang Frenchman nga si Sandy Casar, Vladimir Efimkin sa Russia ug laing taga Spain nga si Mikel Astarloza.

Bisan pa sa daghang mga birada nga gihimo atol sa unang duha ka hugna nga pagtungas niadtong adlawa diin nahumitang na sa peligro ang lider, ang Italyanong si Rinaldo Nocentini mao gihapon ang kampiyon sa yellow jersey.

Ang 25 anyos nga si Sanchez kinsa mao sab ang midaog sa Paris-Nice ug lain pang unom ka lumba karong tuiga, maoy stage winner sa Tour in Aurillac sa miaging tuig.Ang labing bag-o niyang kadaogan nakuha niya sa maong adlaw dihang ang iyang kauban nga si Oscar Pereiro, ang Tour winner sa 2006, miundang tungod ka kakapoy.

Si Sanchez maoy nahimong flag bearer sa ilang team human mohukom nga dili siya mosalmot sa Tour tungod kay gi-ban siya sa pag-apil og lumba sa Italy ug ang Tour de France milabang man sa Italian territory.

Gisumpayan ni Sanchez ang iyang ngalan ug Leon isip paghandum sa iyang maguwang ug namatay tungod sa aksidente sa motorsiklo kaniadtong 2005.

“I’m lucky to be in such a team. I dedicate this victory to my teammates, to my father and my brother who is up there,” matod pa ni Sanchez.

Ang pagbanat batok sa Astana team ni Alberto Contador ug ni Lance Armstrong, ang ikaduha ug ang ikatulo sa overall standings daan nang gituohang mahitabo. Nitabo gyud apan wala kini makapaluya kanilang duha.

“Evans and Schleck tried to attack but it was too early in the stage,” matod pa ni Contador.

Si Cadel Evans ang Tour runner-up sa miaging duha ka seasons, naglaum nga dibuynason sa unang hugna sa pagtungas niadtong Sabado didto sa Port d’Envalira nga may gilay-ong 2,400 ka metros.

Ang Australyanong si Evans kinsa nabiyaan og tres minutos sa unang semana sa lumba, naplide ug wala na gyud maka-apas atol na sa lungsongon.

Si Evans nagkanayon nga ang ubang walo ka riders nagdumili pagpakig-alayon tungod sa kahadlok nga gukoron sila sa Astana: “They acted like children, telling me to get away,” nagkanayon si Evans.

Ang ikaduhang hugna sa pagtungas niadtong adlawa didto sa Col d’Agnes ug nakahigayon si Andy Schleck sa paghagit sa mga riders sa Astana.

Si Schleck nga usa ka Luxembourg climber, gikoronahan nga labing maayong batan-ong rider sa miaging tuig sa Tour de France ug misuway pagtagak sa mga inilang riders apan napakyas.

Sa kataposan, si Efimkin misuway unta paghunat og maayo apan si Sanchez gyud ang miguwang kinakusgan ug gi-apas si Casar duol na sa finish line aron modaog sa maong lap.

“I made a little mistake but it was hard with two Spaniards in the break working together and Efimkin, who did not do any work,” si Casar nagkanyon.

May katarungan nga gisakitan si Casar tungod kay mao kadto’y ikalimang higayon nga mitapos siya sa second place sa maong hugna sa Tour de France.

Ang lumba karon ngadto sa Tarbes nga adunay gilay-on nga 160.5 kilometros mas mubo apan adunay duha ka maanindot nga tungason didto sa Aspin ug sa Tourmalet.  - Gabby G. Malagar (BANAT NEWS)