Mandaue Jaycees Team B hari sa JBA cagefest
CEBU, Philippines - Mipatigbabaw gyud ang Mandaue Jaycees-Team B human gipilde ang Rich Media, 86-73 sa tinaktakay nga Game-3 aron pagsakmit sa korona sa Jaycees Basketball Association (JBA) diha sa City Sports Club-Cebu gym sa Cebu Business Park.
Ang kanhi FEU pointguard nga si Alelu Flores ug ex-USC Warrior Archie Coros maoy migara’g pangatake alang sa Mandaue-B, kinsa mipahamtang sa Rich Media og 12 puntos nga lubong sa first period sa iskor nga 27-15.
Giprotektahan sa Mandaue-B ang ilang labaw hangtod nga ilang nakuha ang 13 puntos nga kadaugan.
Si Flores maoy nangulo sa Mandaue pinaagi sa iyang 19 puntos, samtang sila si Jerome Acebron, Ritchie Garcia, Dennis Acebron ug Coros parehong nakakuha og double figures.
Si Jeremy Huang milansang sab og 19 puntos aron pangulohan ang Rich Media, samtang si Jazon Jae Estella midugang og 17 puntos.
Si Flores kinsa maoy nahimong MVP mao sab ang midaog sa free throw shooting competition human makapasulod og siyam sa 10 ka tira.
Ang tandem nilang Dindo Sausa ug Franco Te sa Uptown Jaycees maoy midaog sa 2-on-2 shootout sa ilang 70 puntos.
Si Jun Barreto sa Mack Mayer maoy giilang three-point king sa iyang 12 puntos.
Puntos Matag Usa
Mandaue-B (86) - Flores 19, J. Acebron 16, Garcia 15, D. Acebron 14, Coros 13, Cortes 9
Rich Media (73) - Huang 19, Estella 17, Potencioso 16, Lo 13, Que 3, Besanes 2, Mercado 2, Sy 1. - Gabby G. Malagar (BANAT NEWS)
- Latest
- Trending
