Yukbo Kang MJ

CEBU, Philippines - Kaniadtong Mayo 2 human modaog ang atong boxing icon nga si Manny Pacquiao batok kang Ricky Hatton didto sa MGM Grand Hotel sa Las Vegas, Nevada, mideklarar dayon ang inilang promoter nga si Bob Arum ug nagkanayon nga “Manny Pacquiao is the greatest fighter that ever lived”.

Kagahapon atol sa memorial service pipila ka oras sa wala pa ilubong ang King of Pop nga si Michael “Moonwalk” Jackson, ako sang nakita sa television nga ang mga inilang tawo sa natad sa musika ug entertainers sa tibuok kalibotan, mibutyag nga si Michael Jackson ang "the greatest entertainer that ever lived".

Sukad namatay si MJ kaniadtong Hunyo 25 didto sa iyang mansion sa Los Angeles, California, wala nay puas ang mga balita—pamantalaan, radyo ug telebisyon nga kanunay naghatag og update kalabot sa iyang kamatayon hangtod na sa adlaw sa iyang lubong kagahapon diin gihimo ang memorial service didto sa Staples Center sa Los Angeles, ang homecourt sa NBA champion LA Lakers.

Ako nagdako sa mga awit sa The Beatles nilang John Lennon, Paul McCartney, George Harrison ug Ringo Starr ug dungan-dungan ra usab kini sa kasikatan sa The Jackson 5 sa managsoong MJ, Jermaine, Marlon, Tito ug Janet. Dili malalis sikat sab ang Beatles ug daghang maantigo sa ilang kanta tungod kay gawas pa nga sayon ang chords sa gitara, yano sab ang lyrics.

Dili sab nato malalis nga sikat kaayo si MJ apan ang nakaparat lang kay pwerteng lisora sundon sa iyang kanta tungod sa dili natural nga tingog nga gitawag ug ‘falsetto’ kon ‘false-voice. Adunay mga Sugboanon mga makakuha sa tingog sa Air Suppy, Bee Gees, Eagles ug Freddie Mercury sa Queen apan wala pa ako makadungog nga adunay nakakuha sa tingog ni MJ kay unang tudling pa lang sa iyang awit, mohangos ka na sa kakapoy sa sigeng pugong-pugong aron ma-ipit ang imong tingog nga kunohay mura’g tingog sa babaye. Mao kanay nakapahimo niyang pinakaamaayong entertainer sa tibuok kalibotan ug dili ako mosupak niana.

Daghan usab kaayong misundog sa iyang gipasiugdahan nga sayaw ang ‘moonwalk” apan bisan si Gary Valenciano o ang tv host nga si Jojo Alejar dili gihapon makasundog niana. Kadto sila si Neil Armstrong, Edwin “Buzz” Aldrin ug si Michael Collins ang mga astronauts sakay sa Apollo 11 nga mitugpa sa buwan apan ambot og maantigo ba kaha kadto sila mosayaw og moonwalk.

Sa record, ang pinakasikat nga awit ni MJ mao ang “Thriller” apan alang kanako ang pinakasikat mao ang Billy Jean kay gawas pa nga usa kadto ka solo dance exhibition, makalingaw ang lyrics kay ma-igo ang mga gwatsinanggong mga lalaki nga dili moangkon sa ilang mga pinaangkan.Ang Thriller, Beat It ug Dangerous, daghan kaayo’g props nga gigamit dili parehas sa Billy Jean nga pulos gyud sayaw diha sa stage.

Misamot lang kasikat ang Thriller tungod sa kadaghan sa misundog lakip na kanila ang mga Dancing Inmates diha sa Cebu Provincial Detention and Rehabilitation Center (CPDRC) ubos ni Capitol security consultant Byron F. Garcia.

Akong gihatagan og ehemplo ang Billy Jean tungod kay mao kini ang theme song sa mga gwatsinanggong mga lakali nga dili moangkon sa ilang uyab ug dili sab mo-angkon nga aduna silay anak sa maong babaye. “Billy Jean is not my lover, she just the girl who claims I am the one and the kid is not my son.” Hastang luyoa no?

Si MJ natawo kaniadtong Agosto 29, 1958 didto sa Gary, Indiana ug namatay siya sa edad 49 apan dul-an na 50 karon pang sunod buwan.

Pipila sa nga mitambong sa memorial service kagahapon mao ang kauban ni MJ sa “We Are The World” nga usa ka fund-raising sa USA For Africa nga sila si Lionel Ritchie ang kanhi lead singer sa The Commodores ang nagpasikat sa akong paboritng kanta “Young Girls Are My Weakness” ug si Stevie Wonder, ang idol sa akong higala nga akong nganlan og Sige’g Wonder.

Didto sab sa Staples Center sila si Kobe Bryant ug ang laing MJ nga si Magic Johnson. Lain pa gyung MJ apan wala didto mao si Michael Jordan.

* * *

Ugma, Hulyo 14 pagahimoon ang F. Llamas Youth Association (FYA) All Star Game diin adunay ipahigayon nga All Star Game tali sa Dark Team ug sa Light Team nga pagasalmotan sa mga piniling players sa nagpdayong FYA 1st Vice-Mayor Mike Rama Cup. Aduna say pagahimoon nga buzzer-beater ug three-point shootout. Karong semanaha sab himoon ang finals sa maong torneyo.

SG Miscellaneous. Happy 90th anniversary of The Freeman this coming July 18. Good luck to all of us who are helping hand in hand for the improvement of Cebu’s oldest newspaper. More Power to The Star Publications management—Sir Miguel Belmonte and to Sir Dodong Gullas and the entire Freeman and Banat family.  - BANAT NEWS