De Los Santos, Bartolo nanghawud sa 5th leg sa Run for Sight

CEBU, Philippines - Nigawas nga hari ug reyna sa karsada sila si Mary Grace De Los Santos ug Elmer Bartolo dihang ilang giharus ang tagsa-tagsa nila ka dibisyon sa 5th leg sa Run for Sight kagahapon diha sa Cebu Doctors University (CDU) grounds. Si De Los Santos nilampos pagkulit og laing kampiyonato sa maong lumba pinaagi sa iyang oras nga 41:03.970 alang sa 10K Womens Open, gisundan nila ni 33rd Milo champion Madelyn Carter sa iyang oras nga 44:10.800 sa second place samtang si Abby Ponce mipahiluna sa third place sa iyang oras nga 1:04:04.650.

Gidominaran usab ni Bartolo ang 10k Mens Open human gitapos niya ang lumba sa oras nga 34:10.300, samtang si Eugene Delposo nagsunud kaniya sa oras nga 34:54.400 ug si Revodem Aranas sa oras nga 35:41.010 alang sa ikatulong pwesto.

Sa 5K Womens, giunhan ni Joery Ann Lee si Donna Cruz-Larrazabal aron masakmit ang kampiyonato. Si Lee mikulit og oras nga 22:27.490 samtang si Cruz-Larrazabal nagsunod kaniya sa oras nga 26:20.920. Si Betty Velosa maoy third placer sa oras nga 28:33..260.

Si Reprinel Banzon maoy kampiyon sa 5K Mens sa iyang oras nga 16:59.880, gisundan nila ni Sherwin Managil (17:14.320) ug Charlie Berberio (17:49.490) sa ikaduha ug ikatulong dapit. – BANAT NEWS