Maayong adlaw, una sa tanan akong pasalamatan si Sir Juanito V. Jabat, ang publisher sa The Freeman ug Banat News nga mao usab ang atong editor-in-chief niining numero unong tabloid sa Visayas, ingon man si John Rey Saavedra, ang associate editor ug ang sports editor nga si Yoyo Abayan sa paghatag og kahigayonan nako nga makatampo og lindog dinhi.
* * *
Importante kaayo ang pagkat-on sa basic techniques sa martial arts sanglit mao kini ang sumbanan sa tanang advance variations mapa-linear martial arts o circular martial arts. Kining "linear" mao ang mga pangamot nga mogamit og kusog inubanan sa techniques, samtang ang circular mao ang paggamit sa techniques ug gamay lang nga kusog.
Importanteng tun-an ang basics ilabi na niadtong gustong motungtong sa ring o mokumbati sa torneyo kay kun magkinaunsa aduna sila'y fall-back nga magamit kun di mosaler ang mga advance techniques nga ilang nakat-onan.
Sa kadugay na nakong sige'g tan-aw sa mga torneyo ug kompetisyon, pipila lang ang nakita nakong midaog nga migamit og basics, apan sagad kanilang migamit og basic techniques mipahunong sa ilang mga kaatbang sa sayong bahin sa mga rounds. Tinuod mas daghan ang midaog nga migamit og advance techniques, apan kasagaran nakalahutay og taas nga rounds una pa nila napugngan ang ilang kaatbang.
Wala nako ipasabot nga di na lang gyud tutokan pagtuon ang advance techniques kay mao bitaw'ng gitawag na siya og advance tungod kay ang mga basics nasabtan nga duna pa diay daghang variations nga mahimong i-apply.
Kun ang usa ka fighter menus og kaalam sa basics tungod siguro sa rason nga mas ilang gihatagan og taas nga oras pagtuon ang advance techniques. Dili kalikayan nga mablangko sila sa tunga-tunga sa kumbati, apan niadtong gi-master gyud ang basics daghan silang mahuna-hunaang variations human sa execution sa basics.
Ang alpabeto nagsugod sa letrang “A,” ang pag-ihap nagsugod sa “Usa” ug ang paglakaw magsugod sa unang tikang. Dili ba? Susama sa martial arts, ang tanang advance techniques nagsugod sa basics, busa di gyud angayang hikalimtan. Kining ato pasidaan lang basi sa atong nakoykoyan.
* * *
Wala ko magdahom nga sa unang gula sa akong lindog niadtong milabay'ng Domingo (Hulyo 5) duna dayo'y mi-text nako. Sila mga kahigalaan ko diay nga dugay nang nagsunod sa Banat News sukad pa niadtong correspondent pa ako niining maong pamantalaan.
Ako usab nga gipasalamatan ang akong mga fraternity brothers diha sa Daanbantayan nga mibasa sa akong lindog nga sila si Alfie, Hebz, Taticz, Leo, Harley, Eel, Crztr, Kalag ug sa tanang taga Daanbantayan nga magpiyesta karong Agosto.
Ipahibalo usab nato ang pagbalhin na sa Daito Ryu Aiki-Jujitsu, Kogyokan Dojo Honbo diha sa Minglanilla gikan sa kanhi national headquarters niini sa Fernandez Bldg. diha sa barangay Suba, Cebu City. Duna na say ikaduhang dojo ang DTR Aiki-Jujitsu diha sa Bontores, sa barangay Basak, Cebu City. Kini magtudlo og traditional martial arts.
* * *
Alang sa mga komento, sugyot ug pahibalo, e-mail sa bat69ph@yahoo.com.