Yawi sa kalampusan

Sa matag paningkamot sa tawo sa lain-laing field of endeavor, maoy iyang gitinguha ang pagkab-ot sa kalampusan. Ang kalampusan maoy tuyo ug tumong sa kinabuhi. Ang kalampusan usa ka gumaran sa kalipay. Walay tawo nga dili gustong molampos. Butang nga dili kahimut-an ni bisan kinsa ang gahong sa kapakyasan.

Aron molampos, gikinahanglan sa tawo ang tukmang giya ug hustong mga ideya kun unsaon pagkab-ot niini. Kinahanglang may direksiyon ang iyang pagpanikaysikay aron dili mahulog sa walay kapuslanan ang iyang paningkamot. Labaw sa tanan, gikinahanglan niya ang tukmang yawi nga makaabli sa pultahan sa kalampusan.

Ingon sab niini sa billiard sport. Gikinahanglan sa magdudula ang matuod nga yawi sa kalampusan aron magmalampuson ang iyang billiard career. Kun dili niya mahuptan ang yawi sa kalampusan, seguradong mapakyas siya. Busa kinahanglang masabtan niya ang hingpit kun unsa ang career nga iyang gisudlan aron makaila ug masayod siya kun unsa ang gikinahanglang yawi nga maoy makaabli sa pultahan sa kalampusan.

Ang librong Snooker and Billiards nag-ingon: "The key to successful billiards is the cue action."

Ang gihisgutan sa maong libro mao ang aktuwal   nga pagdula. Buot ipalutaw sa tagsulat sa nahisgutang libro ang dugokan sa kalampusan sa pagdula og bilyar. Ang uyok sa kalampusan anaa sa hustong pagdula. Ang hustong pagdula mao ang pagtuman sa tanang mga lagda ug batakang mga bulohaton sa dula. Dinhi masabtan sa magdudula nga ang yawi sa malampusong pagdula og bilyar anaa ra diay sa lihok sa tako.

Dili malalis ang maong kamatuoran. Ang tako mahinungdanon kaayo sa pagdula'g bilyar kay kini ang bugtong koneksiyon sa magdudula ngadto sa bola. Busa, anaa sa cue action ang pundasyon sa kalampusan. Kun husto ang paggamit sa magdudula sa tako, seguradong maangkon niya ang kalampusan sa iyang pagdula.

Kun bahin na sa cue action ang hisgutan, ang unang angay masabtan mao ang hustong paggamit niini. Ang kusog nga i-apply ngadto sa tako aron pagpasiugda og epektibong tayada. Nagdepende ang gikusgon sa pagtira sa gilay-on ug plastada sa mga bola sa ibabaw sa billiard table. Kini bantayanan kaayo.

* * *

(Mga sugyot ug pakisayod? Text sa 0910-8105522)