Mialnea Stones nagsolo sa 2009 LLBA Friendship Cup

CEBU, Philippines – Miposte sa ilang ikaduhang sunod-sunod nga daog ang Mialnea Stones human nila lumsi ang NMC VKK Scuba Divers, 84-65 sa nagpadayong aksiyon sa 1st Villas Magallanes League nga giuloha'g "LLBA Friendship Games 2009" didto sa Villas Magallanes Gym sa Sta. Lucia Properties sa Basak, dakbayan sa Lapu-Lapu.

Si Temporada misiak og 14 puntos, samtang si LLBA commissioner Allan Yu ug Soroño mitipak og 12 puntos matag usa alang sa Mialnea Stones nga temporaryo karong nagsolo sa liderato sa ilang 2-0 win-loss record.

Ang natundag nga NMC VKK Scuba Divers gipangulohan ni Victor Malingin, kinsa mipana og 16 puntos. Ang NMC VKK ni team owner Martinito Villamor mao na lang ang bugtong koponan nga wala pa makatilaw og daog sud sa duha ka duwa.

Sa pasiunang duwa, ang Smart Titans nilang Dr. Ouano ug Dr. Ceniza mihipos sa labing unang daog batok sa Daniela's Internet Café ni team manager Billy Nadado sa iskor nga 75-71.

Ang Smart Titans gipangulohan ni Dr. Ouano, kinsa mikulit og 17 puntos, lakip na ang upat ka triples, gisundan ni Mario Bancale sa iyang 13 puntos.

Sa gihapon, sila si Erne Ganto ug Fortogaliza mao sab ang nangulo sa pilderong Daniela's Internet Café nga nagkumboya og 35 puntos. Si Ganto mipupo og 20 puntos, samtang si Fortogaliza miani og 15 puntos alang sa Daniela's Internet Café ni coach Jerry Agusto.

Sa laing aksiyon, ang Yan C Rico ni team owner Atty. Rico Amores nakapuga bitbit ang 78-77 nga kadaugan batok sa John Videoke.

Nag-ambo na unta ang John Videoke ngadto sa ganghaan sa kadaugan dihang milabaw kini og uno punto sa katapusang otso segundos sa iskor nga 77-76, apan si LLBA president Alan Sepe mipasud sa iyang marka bahala nga itsa dungan ang pagserbato sa buzzer nga maoy naka-anghel sa Yan C Rico.

Si Sepe mirehistro sa iyang game-high 35 puntos aron pangulohan ang Yan C Rico, samtang ang naparot nga John Videoke gipangulohan ni Pompi Ngujo sa iyang 26 puntos.

Ang LLBA Friendship Cup 2009 gipaluyohan sa Overseas Courier Service Inc. (OCS)-Cebu, Boylen Marketing, Salo-Salo Inday Pinas Sutukil, Michael Cariquitan, Annalee Pedroza, Tambuli Beach Resort, Comfa General Merchandise, Gin Pharmacy, Purcia Transport, I3R Motor Parts ug Maribago Seaview Pension

Gisuportahan sab kini ni Hon. Mayor Arturo Radaza, Brgy. Capt. Paz Radaza ug ni Brgy. Capt. Lauro Soroño.

Puntos Matag Usa

Unang duwa:

SMART TITANS (75) - Ouano 17, Bancale 13, Impas 12, Aries 11, Gutib 6, Labrada 5, Lamoste 4, Villaflor 4, Adlit 2, Ramos 1

DANIELA'S INTERNET (71) - Ganto 20, Fortogaliza 15, Bontis 9, Bensi 8, Agosto 7, Amodia 5, Labadan 3, Eroles 3, Coming 1

Ikaduhang duwa:

YAN C RICO (78) - Sepe 35, Cadungog 8, Celiz 8, Hiyas 6, Lapoja 5, Medina 4, Ochea 4, Cosep 4

JOHN VIDEOKE (77) - Ngujo 26, Magat 13, Longay 12, Villamor 8, Dignos 6, Simbajon 5, Fausto 4, Cantila 3

Ikatulong duwa:

MIALNEA STONES (84) - Temporada 14, Yu 12, Soroño 12, Patalinghug 9, Ybañez 9, Francisco 8, Bentazal 8, Daluz 6, Llenes 4, Igot 2

NMC VKK (65) - Malingin 16, Romero 11, Teraper 10, Paquibot 8, Asilom 6, Decembrano 5, Villamor 5, Orque 4 – BANAT NEWS