CEBU, Philippines – Nakatabla ang team Rich Media ni Richard Mercado dihang ilang nabawsan ang Mandaue Jaycees-B, 77-69 sa Game-2 sa ilang best-of-three final series sa Jaycees Basketball Association (JBA) niadtong Domingo didto sa USPF gym sa Lahug.
Ang Rich Media mi-rally sa fourth quarter aron pagposte og 16 puntos nga bentaha, 60-44, apan ang Mandaue-B mihulga pinaagi sa nagpungasi nga basket nilang Paul Alelu Flores ug Jerome Acebron aron mapahakan, 63-65 sa nahabiling 1:45 sa duwa.
Hinuon, wala molungtad ang rally sa Mandaue-B tungod sa daghang turnovers nga ilang nahimo.
Sila si Beboy Potencioso ug Jeremy Huang maoy mitibawas sa daginutong oras alang sa Rich Media.
Sila si Jazon Jae Estella ug Huang miposa og 16 puntos matag usa alang sa Rich Media, samtang si Potencioso mi-iskor og 13 puntos. Sila si Glenn Besanes ug Dennis Que mitampo og 10 matag usa.
Si Flores, kanhi sakop sa FEU Tamaraw maoy nangu sa Mandaue-B sa iyang 16 puntos, gisundan ni Acebron pinaagi sa iyang 14 puntos.
Puntos Matag Usa
Rich Media (77) - Estella 16, Huang 16, Potencioso 13, Besanes 10, Que 10, Lo 7, Mercado 3, Sy 2
Mandaue-B (69) - Flores 16, J. Acebron 14, D. Acebron 11, Marata 10, R. Garcia 6,.P. Garcia 3, Cal 3, Balbuena 2, Toledo 2, Cortes 2 – BANAT NEWS