LLBA Friendship Games 2009

CEBU, Philippines – Gikatihan dayon og daog ang Danielas Internet Café, John Videoke ug Mialnea Stone sa ilang unang aksiyon sa 1st Villas Magallanes League nga giulohan og "LLBA Friendship Games 2009" didto sa Villas Magallanes gym sa Sta. Lucia Properties sa Basak, dakbayan sa Lapu-Lapu.

Ang Danielas Internet Café ni team manager Billy Nadado milansang sa ilang unang daog pinaagi sa paglubong sa Yan C Rico sa iskor nga 76-56.

Upat ka magduduwa nga gipangulohan ni Erne Gigante ang mikulit og double-figures alang sa Danielas. Si Gigante miposte og 12 puntos, gisundan ni Portogaleza nga mitimang og 11 puntos, samtang sila si Junjun Eroles ug Coming mitimbre og 10 puntos matag usa alang sa maong kalampusan.

Si Lapu-Lapu Basketball Association (LLBA) president Alan Sepe mao sab ang topscorer sa gilubong nga Yan C Rico nga mirehistro og 15 puntos.

Hilabihan kahugot ang gipakitang depensa ni King Celiz, apan wala kini makapiog sa mga atake sa Danielas Internet Café ni coach Jerry Agusto.

Sa laing duwa, ang John Videoke ubos sa giya sa ilang team manager Lito Magat ug Pompi Ngujo nakalingkawas gikan sa mga kamot sa NMC VKK Scuba Divers ni team owner Martinito Villamor sa kulbahinam nga duwa bitbit ang 57-56 nga kadaugan.

Si Magat mi-iskor og 13 puntos, apan si Ngujo maoy daku'g nakuhang iskor alang sa John Videoke pinaagi sa iyang 16 puntos.

Mirehistro sab og daog ang Mialnea Stone ni commissioner Alan Yu pinaagi sa paglubong sa Smart Titans sa iskor nga 60-48.

Sila si Bulldog Ybañez ug Temporada nagkumboya og 1 puntos aron pangulohan ang Mialnea Stone nga wala gyud mahulga gikan sa pagsugod hangtod nahuman ang duwa.

Bugtong si Ramos lang ang mikutlo og double figures alang sa Smart Titans nilang Dr. Ouano ug Dr. Ceniza pinaagi sa iyang 11 puntos.

Ang LLBA Friendship Cup 2009 gipaluyohan sa Overseas Courier Service Inc. (OCS)-Cebu, Boylen Marketing, Inday Pinas Sutukil, Tambuli Beach Resort, Comfa General Merchandise, Gin Pharmacy, Purcia Transport, I3R Motor Parts ug Maribago Seaview Pension

Gisuportahan sab kini ni Hon. Mayor Arturo Radaza, Brgy. Capt. Paz Radaza ug ni Brgy. Capt. Lauro Soroño.

Puntos Matag Usa

Unang duwa:

JOHN VIDEOKE (57) - Ngujo 16, Magat 13, Lungay 12, Dignos 7, Simbajon 4, Fuentes 2, Cantila 2, Pausto   1

NMC VKK DIVERS (56) - Paquibot 10, Decembrano 10, Malingin 8, Romero 8, Villamor 6, Peraper 5, Barbado 4, Orque 3, Aselom 2

Ikaduhang duwa:

MIALNEA STONE (60) - Ybañez 11, Temporada 10, Llenes 8, Daluz 7, Soroño 6, Yu 5, Igot 5, Bentazal 4, Francisco 2, Patalinghug 2

SMART TITANS (48) - Ramos 11, Lamoste 9, Labrada 6, Bancali 5, Villaflor 4, Ceniza 3, Impas 3, Aris 3, Adlit 2, Gutib 2

Ikatulong duwa:

DANIELAS INTERNET CAFE (76) - Giganto 12, Portogaleza 11, Coming 10, Eroles 10, Amodia 9, Buntes 7, Labadan 6, Nadado 5, Bensi 4, Agosto 2

YAN C RICO (65) - Sepe 15, Cadungog 14, Lapoja 8, Medina 6, Ochea 6, Hiyas 4, Celiz 4, Degolacion 4, Ybañez 3, Cosep 1 – BANAT NEWS