CEBU, Philippines – Bugtong ang Phat Thursday Restaurant and Sports Bar ang nakapukan sa Alberto’s Pizza sa ilang tinaktakay nga kampiyonato, 63-58, aron pag-angkon sa korona sa Bianca Marketing-sponsored 5th Lucky Tableware Regulars Basketball Tournament didto sa Visayan Glass gym sa Brgy. Guadalupe.
Mao kadto ang unang pilde sa Alberto’s Pizza, kinsa maoy nakakupot sa unang luna sa crossover semis human ilang nasilhig ang walo ka duwa sa double round robin eliminations.
Nikamada dayon ang Phat Thursday pagsugod sa duwa aron pagposte og 21 puntos nga labaw, apan ang Alberto’s Pizza alistong nakabangon ug mikitkit sa labaw, 21-22 paghuman
sa unang 10 minutos sa duwa.
Gikan niadto, ang Alberto’s Pizza wala pabiya og daku, apan sila si Earl Atonducan, Jross Ceniza ug Michael Viliran milansang og mga mahinungdanong puntos nga maoy nagtuboy sa Phat Thursday ngadto sa kadaugan.
Si Ceniza, kinsa maoy MVP mirakrak og 16 puntos, samtang si Mark Villagonzalo maoy nangulo sa Alberto’s Pizza sa iyang 28 puntos.
Sa unang duwa, ang Visayan Ballers misantako sa i828 sa iskor nga 74-68 alang sa ikatulong luna.
Puntos Matag Usa
Unang duwa:
Visayan Ballers (74) - Hendive 34, Espada 23, Abellanosa 10, Cañete 5, Caballero 2
i828 (68) - Espinosa 22, Lauzar 18, Lazaga 11, Maglinte 9, Gaid 8
Ikaduhang duwa:
Phat Thursday (63) - Ceniza 16, Atonducan 14, Pancho 13, Viliran 9, Seroy 6, Arcilla 3, Orosio 2
Alberto’s Pizza (58) - Villagonzalo 28, Grogaard 13, Tandan 10, Prete 3, Bero 2, Alvarez 2 – BANAT NEWS