CEBU, Philippines – Gipadayag ni ALA boxing Mark Jason Melligen nga gusto siyang mosukod sa abilidad ni undisputed welterweight champion Floyd Mayweather Jr.
Ang Pinoy welterweight prospect nga si Melligen, kinsa nitambong sa press conference sa Summit Fight Night kagahapon didto sa Sugbahan Restaurant sa dakbayan sa Mandaue, nagkanayon nga damgo niya nga mahatagan og kahigayonan sa pakigharong sa kanhi pound-for-pound king.
Nasayran, sila si Melligen ug Mayweather nag-abot ibabaw sa ring dihang nahatagan siya'g kahigayonan nga maka-sparring ang Amerikanong boksidor atol sa una niyang sangka didto sa Las Vegas batok ni Gerardo Cesar Prieto.
Si Melligen, 23-anyos, mihulagway ni Mayweather nga usa ka paspas ug utokan nga boksidor.
Si Melligen (15-1, 11KOs) nga bag-o pa lang miabot gikan sa Mexico human niya gipilde si Fabian Luque pinaagi sa second round knock-out, miasoy nga mas pabor siya ni Manny Pacquiao kun madayon ang sangka nila ni Mayweather. Matud pa ni Melligen maglisud og walhong kontra sama ni Pacquiao.
Ang lumad nga taga-Bacolod City nga si Melligen nipirma og upat ka tuig nga kontrata ubos sa Top Rank Inc. ni Bob Arum.
Lakip sa mga notadong boksidor nga gustong harungon ni Melligen naglakip ni David Diaz, Michael Katsidis ug Ricky Hatton.
Si Melligen giatangang mopakita og aksiyon karong Agosto 15 batok sa wa pa mailhing Mehikano sa undercard sa Nonito Donaire Jr.-Hugo Cazares bout didto sa Hard Rock Hotel and Casino sa Las Vegas. – BANAT NEWS