CEBU, Philippines – Tinun-an sa Cebu Doctor's University (CDU) nga si Shaneen Ched Sia, milaslas og gold ug bronze medals sa 9th Asean Taekwondo Federation Championships dili pa dugay didto sa Ho Chi Minh City sa Vietnam.
Si Sia sa Cagayan de Oro City, nga mikuha'g kursong Bachelor of Science in Physical Therapy sa CDU, maoy usa sa mga sakop sa nasudnong koponan nga nidominar sa poomsae event uban nilang Janice Lagman ug Camille Alarilla.
Ang poomsae o matang sa taekwondo, bag-o lang dinhi sa nasud, apan sila si Sia, Lagman ug Alarilla mipakita nga ang Pinays mahimong mopukan sa ilang mga kaatbang gikan sa nagkalain-laing nasud sa Asya.
Human sa team competition, si Sia mi-away sa junior girls individual poomsae ug sa kyorugi (sparring) diin siya mitiltil og bronze.
Sa kumbati sa kyorugi, ang 2nd dan black belter nga si Sia, napilde sa final round sa usa lamang ka punto, 2-3 batok sa pambato sa Indonesia ubos sa featherweight division.
Bisan pa niini, ang kalampusan ni Sia daku'g natabang sa Pilipinas sa pagsakmit sa overall championship batok sa host Vietnam, Indonesia, Malaysia, Singapore, Thailand, Laos ug Cambodia.
Si Sia mobalik og ensayo ubos sa Sugbuanong 4th dan black belter Kenn Toledo alang sa National Poomsae Taekwondo Championships karong Hulyo 26 didto sa Rizal Memorial Sports Complex sa Vito Cruz, Manila. – BANAT NEWS