Sitio Atis midget, mini teams naghari sa Sambag I caging

CEBU, Philippines – Gilubong sa Sitio Atis ang St. Jude, 75-56 aron pagsakmit sa korona sa midget division sa 2009 Sambag I Summer Basketball League diha sa sports complex sa maong barangay.

Ang Sitio Atis maoy mikontrolar sa pagsugod hangtod nga nahuman ang duwa. Gitapos sa Sitio Atis ang first half sa iskor nga 41-34. Ila pa nga gikalingawan og inat ang labaw sa nahabiling duha ka kuwarter hangtod nga nakab-ot ang 19 puntos nga kalampusan.

Sa laing bahin, wala sab magpabitin ang tsikiting sa Sitio Atis dihang ilang gidominar ang mini category human gipilde ang Team Rovics sa iskor nga 56-46.

Si Tatin Gairanod mipabuto og 24 puntos alang sa Sitio Atis, nga maoy nidominar sa duwa gikan sa pagsugod hangtod sa paghuman alang sa ilang ikaduhang sunod-sunod nga korona.

Gipasiugdahan sa Sambag I barangay council ubos sa liderato ni Jerry L. Guardo, ang maong liga gipaluyohan sab sa Uniherb Philippines, usa sa nag-unang health companies sa nasud nga tiggama sa nabantog nga food supplements sa   Arthro, Kidneycare, Diabet, Heartvit, Eyeberry, Athan, Slima ug Hardman.

Puntos Matag Usa

(Midget Division)

Sitio Atis (75) - Abadia 23, Canoy 17, Dolino 8, Delan 7, Goangco 7, Fernandez 5, Jubay 4, Sala 2, Labay 2

St. Jude (56) - Robledo 30, Llaguno 8, Cainglet 8, Fernandez 3, Sonsona 3, Valderosa 2, Tan 2 

(Mini Division)

Sitio Atis (56) -T. Gairanod 24, Folache 15, Caballero 8, Fajardo 3, Rollan 3, N. Gairanod 3

Rovics (46) - Baet 28, Go 9, Mendez 5, R. Yap 2, J. Yap 2 – BANAT NEWS