Gray kampiyon sa OPASCOR inter-color cagefest

CEBU, Philippines – Nakalingkawas ang Gray team sa kulbahinam nga duwa batok sa Black team pinaagi sa pag-iskor og 75-72 nga kadaugan aron pagsakmit sa korona sa 2009 OPASCOR Inter-Color Basketball Tournament didto sa Barangay Tejero Sports Complex, ning siyudad.

Si Jefferson Lucero mipabuhagay og 20 puntos aron pangulohan ang Gray team pag-ugkat sa titulo. Si Eugene Viagedor mitampo og 18 puntos, samtang si Dotdot Campaña miamot og 12 puntos.

Nangulo sa pilderong Black team mao si Niño Sanoy pinaagi sa iyang 18 puntos, gisundan nilang Gabriel Enrique ug J. Campaña nga adunay 16 puntos matag usa.

Ang 9-0 rally nga gilusad sa Gray team sa paggiya nilang Lucero ug Campaña sa nahabiling 2:14 sa ikaduhang kuwarter maoy nakapa-abante nila og nuybe puntos, 40-31 sa halftime.

Subling milusad og rally ang Gray team aron inaton ang labaw ngadto sa 11 puntos sa third quarter human sa duha ka triples ni Lucero ug sa sayes puntos ni Allan Yaon.

Nakan-an hinuon ang labaw dihang mibawos ang Black team sa final quarter nga nakapakulba sa aksiyon, apan ang Gray maoy mipatigbabaw paghuman sa maong engkuwentro.

Gumikan sa maong kadaugan, ang Gray team mibulsa sa P10,000 nga ganting salapi, samtang ang Black team miuli bitbit ang ganting P8,000.

Sa laing duwa, ang Blue team sa pagpangulo ni Godofredo Villaro Jr. mipukan sa Gold team sa iskor nga 59-47 aron pagpahiluna sa ikatulong dapit.

Si Villaro mipugnit og 16 puntos, samtang si Joel Jagadon mipupo og 15 puntos alang sa Blue, kinsa mibulsa og P7,000.

Puntos Matag Usa

Unang duwa:

BLUE (59) - G. Villaro Jr. 16, Jagdon 15, Astillero 10, Marcelo 10, D. Villaro 4, R. Villaro 2

GOLD (47) - Mollena 10, Jumao-as 8, Arciaga 6, Labus 6, Nuñez 4, Arnulfo 4

Ikaduhang duwa:

GRAY (75) - Lucero 20, Viagedor 18, Campaña 12, Rafols 8, Tabora 4

BLACK (72) - Sanoy 18, Enriquez 16, Campaña 16, Orbiso 6, Alconera 4, Mahinay 2 – BANAT NEWS