Viking Haulers abante sa semis

CEBU, Philippines – Nakasakay gyud sa katapusang biyahe sa bus ngadto sa semifinals ang Viking Haulers human ilang gipilde ang Criminal Intelligence and Investigation Bureau (CIIB), 88-78 sa katapusang duwa sa elimination round niadtong Huwebes sa F. Llamas Youth Association (FYA) 1st Vice Mayor Mike Rama Cup basketball tournament didto sa Vicente Sotto Memorial Gym sa barangay Punta Princesa, ning dakbayan.

Sa usa ka exhibition match, ang Pacman Team nga gipangulohan ni Jingjing Rama mipukan sa FYA Selection sa iskor nga 115-107.

Tungod sa ilang kadaugan, ang Haulers maoy nakaangkon sa katapusang luna sa crossover semifinal ug ilang harungon ang twice-to-beat Kuya Allan sa Light bracket. 

Ang crossover semis sugdan karong Martes uban sa Dark group leader Orillaville makigharong sa fourth-ranked Grandeur ug ang Heartfelt makigsangka sa CIIB sa habig sa Light.

Ang Heartfelt ug Orillaville parehong nakabaton og twice-to-beat incentives.

Ang laing mi-abante sa semifinalists ubos sa Dark bracket mao ang Rollyz Boyz ni Punta Princesa barangay captain Rolly Diorico ug ang Jayra.

Si kanhi USJ-R Baby Jaguar Baeng Medalle maoy nangulo sa Haulers sa iyang 25 puntos, samtang sila si Toper Limbaga ug Joher Ardon mi-iskor og 19 ug 13 puntos matag usa kanila.

Si Roy Veloso mihakot og 20 puntos alang sa CIIB ug gisundan ni Cesar Pandong, kinsa midugang og 18 puntos.

Sa sayo pa, si Leon Floro Eleazar miburak og 29 puntos aron pangulohan ang Pacman Team, samtang ang beterano nga si Mario Suarez miamot og 25 puntos ug si Rene Toring mi-iskor og 18 puntos.

Ang FYA Selection gipangulohan ni Beking Rollon kinsa miposa og 24 puntos, si Junbel Llegunas miamot og 17 puntos ug si Kenneth Marqueda mitunol og 14 puntos.

Ang torneyo sa FYA gipaluyohan sab ni Punta Princesa barangay councilor Ray Gabriel Salgado ug tournament director Boy Atillo.

Puntos Matag Usa

Viking (88) - Medalle 25, Limbaga 19, Ardon 13, Canceko 11, Aguirre 11, Cañete 6, Cal 3

CIIB (78) - Veloso 20, Pandong 18, Maglinte 14, Dela Victoria 6, Quita 5, Maucesa 4, Ybañez 4, Aldemita 2 – BANAT NEWS