CEBU, Philippines – Gilat-an sa Chazyl Mae ni coach Mark Tallo ang Binglens, 80-64 sa ilang tinaktakay nga kampiyonato aron angkonon ang labing unang korona sa 1st M. Lhuillier Kwarta Padala Cup Basketball Tournament didto sa Talisay Sports Complex.
Usa sa mga sinaligan sa Southwestern University (SWU) Cobras nga si Eric Zanoria, mipabuto og 21 puntos alang sa Chazyl Mae, kinsa maoy nidikta sa tempo sa duwa sukad miposte og 20-16 nga bentaha sa unang kuwarter.
Ang Binglens, kinsa gibitoonan kasagaran sa mga beteranong magduduwa misikit sa iskor, 30-33 sa halftime, apan ang Chazyl Mae subling miposte og sayes puntos nga labaw, 53-47 padung sa katapusang 10 minutos sa duwa.
Padayong nangigo ang Chazyl Mae sa final quarter diin ilang gilupig ang Binglens sa pinuntosay, 27-17 nga maoy ilang gihimong hagdanan pagkab-ot sa 16 puntos nilang kadaugan.
Ang kanhi SWU Cobra nga si Alano Caputolan miamot og 12 puntos, samtang sila si Jimwell Torion, Milfred Sampelo, Michael Luga ug si Lanutan mitampo og siyete puntos matag usa alang sa Chazyl Mae.
Si Jessie Lumantas, kinsa mipupo og 16 puntos maoy nangulo sa Binglens, gisundan ni Alain Abellanosa pinaagi sa iyang 14 puntos ug Michael Almonte nga adunay 10 puntos.
Puntos Matag Usa
Chazyl Mae (80) - Zanoria 21, Caputolan 12, Lanutan 7, Torion 7, Sampelo 7, Luga 7, Bat-og 6, Resilla 5, Toring 4, Llaguno 4
Binglens (64) - Lumantas 16, Abellanosa 14, Almonte 10, Abellana 8, Abelong 6, Garcia 4, Mercado 3, Delantes 2 – BANAT NEWS