MANILA, Philippines - Bago magtungo sa Middle East para idepensa ang titulo sa Qatar International 9 Ball Championship sa June 30, gagamitin ni dating World No.1 Dennis Orcollo bilang final tuneup ang BETpoker.net Scotch Doubles All Star Challenge.
“I’m happy to have this opportunity to play in this kind of tournament before I go to Qatar,” ani Orcollo na makakatambal ni dating Asian Games gold medalist Gandy Valle para ibandera ang star studded Bugsy Promotions sa four-way tag team competition na handog ng JBETpoker.net, sa pakikipagtulungan ng Billiards Managers and Players Association of the Philippines.
Ang sarguhang ito ang magsisilbing undercard sa pinakasasabikang Challenge of the Legend: The Maestro vs. The Volcano, a one-on-one 15 ball rotation sa pagitan ni pool icon Efren “Bata” Reyes at dating double world champion Ronnie Alcano na nakatakda sa June 25 at 26 sa The Annex Building SM North EDSA, Quezon City.
Maliban sa Bugsy Boys, aasintahin rin ni former world champion Alex Pagulayan at Rodolfo Luat ang korona para sa Puyat Sports, habang magsasanib pwersa naman sina Lee Van Corteza at Warren Kiamco sa pagwagayway ng Negros Billiards Stable.
Hindi rin pahuhuli sa pagtarget ang Antonio Li-ning-Ramil Gallego tandem ng BMPAP Selection para makamit ang tagumpay sa event na hatid ng Senator Manny Villar’s Villiards Tulong sa Pagsulong ng Sports at Camella Communities at kinikilala ng Billiards and Snooker Congress of the Philippines.
Maliban sa Reyes-Alcano showdown at Scotch Doubles challenge, magkakaroon rin ng torneo para sa mga kabataan at upcoming pool stars sa ilalim ng temang Sipag at Tiyaga 9 ball Tournament. (SFrancisco)