MANILA, Philippines - Tahimik man sa mga nagdaang taon, nanatiling pinakamagaling na cue artist sa bansa ngayon si Ronnie Alcano.
Ang nalalapit nilang paghaharap ni pool icon Efren “Bata” Reyes” ang pinakamalaking tapatang magaganap. Sasabak si Alcano at ang kanyang idolo na si Reyes na magtutuos para sa 15-ball rotation match na may temang “The Maestro versus The Volcano sa June 25 at 26 sa Annex Building ng SM City North EDSA, Quezon City.
“Medyo matagal-tagal na nga rin akong hindi nagtsa-champion, kaya masasabi kong gutom na ulit ako sa karangalan,” wika ni Alcano na sabik na muling magkamit ng panalo matapos parangalang world 9 balll at 8 ball champion noong 2007.
Puspusan ang ensayo, excited si Alcano na makalaban ang best rotation player of all time.
“Rotation is the original pool game of the Filipinos and Efren is the best in it, especially during his prime,” paliwanag ng Bugsy Promotions na pinamumunuan ni Perry Mariano na nagorganisa ng event na pinrisinta ng Camella Communities sa pakikipagtulungan ng Billiards Managers at Players Association of the Philippines at kinikilala ng Billiards at Snooker Congress of the Philippines.
“Actually, we believe that up to now Efren is still the best rotation player in the world, well, until Ronnie proves otherwise,” dagdag pa ni Mariano.
Bitbit ang temang Sipag at Tiyaga 9-Ball Tournament, dalawang undercards ang magpapasimula sa malaking event na kinabibilangan ng JBETpoker.net Scotch Doubles All Star Challenge, four way tournament na tatampukan nina dating world No. 1 Dennis Orcollo at Asian games Gold medalist Gandy Valle (Busy Promotions) dating world champion Alex Pagulayan at Rodolfo Luat (Puyat Sports), Lee Van Corteza at Warren Kiamco (Negros Billiards Stable), at Ramil Gallego at Antonio Lining (BMPAP Selection). (Sarie Nerine Francisco)