Palermo Hotel, Ayurveda Thai Clinic midaog dayon

CEBU, Philippines – Ang Palermo Hotel ug ang Ayurveda Thai Clinic squads nga gilangkuban sa mga Sugbuanong magduduwa, mipakita sa ilang kabangis dihang ilang gipilde ang tagsa-tagsa nila ka kaatbang sa pagsugod sa 2009 Open Invitational Volleyball Tournament didto sa Superdome sa Ormoc City.

Ang Palermo Hotel mipukan sa Western Leyte College sa straight sets, 25-21, 25-20, 25-22 sa ilang duwa sa buntag. Midaog sab sila human gipaluhod ang Ormoc City, 25-11, 25-15, 25-19.

Ang kadaugan sa Palermo gipasiugdahan ni high flying RP team member Jonrey Sasing uban sa suporta nilang Norvie Labuga, Roderick Arenasa, James Ryan Rivera, Ronald Melencion ug Angelo Espiritu.

Sa laing bahin, ang Ayurveda Thai miposte sab og 2-0   win-loss record human nila gipulbos ang Timan, 25-18, 25-19, 25-18 ug dayon ang Ormoc, 25-14, 25-12, 25-14.

Gawas sa mga tropeyo ug medalya, ang makampiyon makadawat sab og P15,000 nga ganting salapi, ang ikaduha makaangkon og P10,000, samtang ang mopahiluna sa ikatulo nga dapit mobulsa og P7,000.

Ang maong kompetisyon nga gisuportahan sa local government sa Ormoc City ubos sa liderato ni Mayor Eric Codilla, usa sa mga highlights sa   ika-379th Ormoc City Fiesta Celebration karong Hunyo 28-29 halad sa ilang balaang patron Señor San Pedro ug Señor San Pablo. – BANAT NEWS