CEBU, Philippines – Nasakmit ni Michael Quiñones ang iyang ikatulong kampiyonato human niya gidominar ang men's single sa 2009 La Paloma Tennis Club (LPTC) Classics niadtong Sabado didto sa La Paloma tennis court sa Brgy. Tisa, ning siyudad.
Ang pambato sa Cebu Country Club Tennis nga si Quiñones mipukan sa higpit niyang kaatbang nga si Francis Largo sa iskor nga 6-2 aron langkaton ang korona.
Sa men's double class-A division, ang Inabanga Tennis Club (ITC) nilang Lofranco Matoc ug Christopher Pitalcuran miugbok sa Villa Aurora Tennis Club (VATC) nilang Larry Pescador ug Joel Mabug-at, 8-1 aron angkonon ang korona.
Ang host team La Paloma Tennis Club nila ni Billy Price ug Smith Basanal mikulit og 8-6 nga kadaugan batok sa Opon Tennis Club (OTC) nilang Vick Radaza ug Lemuel Rubi aron dominahon ang class-B division.
Ang mga nakampiyon sa tagsa-tagsa ka dibisyon nakadawat og P5,000 nga ganting salapi ug gift certificates gikan sa La Fortuna Bakeshop matag usa, samtang ang runners up nakaangkon og P2,500 ug gift certificate matag usa.
Ang tennis tournament gipasiugdahan sa LPTC Tennis Club uban sa suporta sa Uniherb Philippines ni Jonathan 'Atan' Guardo, Chris Sports, Toby's Sports, Gillamac Marketing, NG Khai Development Inc., San Miguel Beer Inc., Pagcor, Dendramil Merchandise ug Skygo Motorcycle. – BANAT NEWS