CEBU, Philippines - Gipadayag ni Rodel Mayol ang iyang kahiubos sa desisyon sa mga hurado atol sa iyang sangka batok sa world junior flyweight champion Ivan Calderon kagahapon nga nisangpot ngadto sa usa ka draw,didto sa Madison Square Garden, New York .
Ang usa ka accidental headbutt sa round four maoy hinungdan sa dakung gisi sa agtang sa Puerto Rican ug nisamot pa kini sa fifth round dihang subling nagkabangga ang ulo sa duha ka boksidor.
Tungod sa kusog nga pag-agas sa dugo gikan sa agtang ni Calderon, napugos ang referee sa paghunong sa away sa 1:15 sa sixth round nga mao usab ang gimando sa ring side physician.
Si Judge Tony Palillo mi-iskor og 58-56 pabor ni Calderon, samtang si Tom Schreck mihatag usab og 58-56 alang ni Mayol. Apan ang ikatulong hurado nga si Steve Weisfeld ni-iskor og 57-all nga maoy nitabla sa away.
Si Mayol nagkanayon nga dako ang iyang pagtuo nga siya ang nidaog sa maong away tungod sa iyang ka-agresibo batok sa undefeated nga si Calderon.
Matud pa usab ni Mayol nga naglaum siya nga hatagan siya og rematch sa kampo ni Calderon aron tiwasun ang naputol nilang engkuwentro.
Si Mayol kinsa nakadawat og dakung suporta gikan ni Manny Pacquiao, nidugang nga andam siyang makigsangka pag-usab ni Calderon kung maayo na ang samad niini aron hingpit na niyang ma-ilog ang bakus sa Puerto Rican.
Sa iyang bahin, si Calderon kinsa nagpabiling WBO junior flyweight champion, ni-asuy nga kahibalo na siya nga ihunong sa referee ang away tungod sa grabeng pag-agas sa dugo sa iyang agtang.
Dili kini ang unang higayon nga nagisi-an ang agtang ni Calderon, atol sa iyang title defense batok ni Hugo Cazares niadtong miaging Agosto, grabeng gisi sa agtang ang nahiaguman sa boksidor nga maoy hinungdan sa 10 ka buwan niyang pagpahuway sa pamuksing. - Lemuel P. Maglinte (BANAT NEWS)