De los Santos midaog laing korona

CEBU, Philippines – Mihipos na sab og laing titulo si Mary Grace de los Santos human manghawod sa 10K run women's division sa 1st Run and Bike for Freedom niadtong Biyernes diha sa South Road Properties (SRP).

Ang Zamboageño nga si De los Santos, kinsa mao sab ang reyna sa Running MAD niadtong Mayo 24, maoy unang nitadlas sa finish line nga mi-oras og 39:35.93. Nagsunod niya si Madelyn Carter sa oras nga 42:28.88, samtang si Joery Lee nalandig sa ikatulo sa oras nga 43:10.94.

Sila si Lorna Bularta (46:47.71) ug Aiza Suwaybaguio (46:55.50) maoy miangkon sa ikaupat ug ikalimang dapit.

Sa men's division, ang beteranong si Angelito Sibayan maoy migawas nga hari human niya gitapos ang dagan sud lang sa 33:02.23. Gisundan ni Revaden Aranas sa oras nga 34:10.57,

samtang si John Phillip Dueñas napunta sa ikatulong dapit 34:33.58.

Si Sherwin Manaquil mipahiluna sa ikaupat nga dapit sa oras nga 34:40.45 ug si Adonis Singson maoy mikapyot sa ikalima sa oras nga 35:33.03.

Sa 5K men's open, si   Miljun Laterte mao sab ang naghari nga mitapos sa dagan sa oras 16:31.58.

Ang managsuong Delposo nga sila si Joel ug Eugene maoy miangkon sa ikaduha ug ikatulo nga dapit. Si Joel adunay oras

nga 16:41.43, samtang si

Eugene mi-oras og

16:46.26.

Mipahiluna sa ikaupat mao si Jess Gonzaga (16:55.94), gisundan ni Santiago Inabio (17:05.38).

Si Miscelee Gilbuena maoy kampiyon sa 5K women's open nga mi-oras og 21:06.62, gisundan ni Hazel Retavale (2:15.15) alang sa ikaduhang dapit ug si Rose Baylon (22:53.96) alang sa ikatulong dapit.

Mi-okupar sa ikaupat ug ikalima nga dapit mao sila si Eden Dampios (24:44.95) ug Katrina Acar (24:36.34). – BANAT NEWS