1st Cebu City Run and Bike for Freedom gilusad

CEBU, Philippines – Liboan ka mga runners ug cyclists ang gilaumang mosalmot sa labing unang Cebu City Run and Bike for Freedom ugmang adlawa diha sa South Reclamation Properties (SRP).

 Si City Councilor Raul 'Yayoy' D. Alcoseba, kinsa usa sa nisuporta sa maong lumba malaumon nga malingaw ang mga mosalmot ug ang mga dumuduong ning usa ka dakung kalihukan dinhi sa Sugbu.

Sa gipahigayong press conference kagahapon didto sa Yayoy's Grill and Resto Bar, si Ginnie Faelnar sa Cebu City Sports Commission ug si Race Coordinator Joel Baring nagkanayon nga ang lapad nga hawanan ug kadalanan sa SRP ang ilang napili aron makapakita og maayo ang mga racers sa ilang abilidad.

Ang lumba adunay tulo ka kategoriya -- ang 3K Fun Run, 5K ug 10K.

Ang 3K sugdan sa alas-6 sa buntag ug manukad kini diha sa Plaza Sugbu sa Cebu City Hall, samtang ang 5K ug 10K mosikad sa alas-4:00 sa hapon ug anha kini manukad sa Mambaling entrance sa SRP.

Sa laing bahin, ang mountainbike event adunay upat ka dibisyon nga naglakip sa beginners, seniors, masters ug veterans, samtang ang road bike event gibuak ngadto sa duha ka kategoriya -- A ug B.

Ang makampiyon sa 10K run mobulsa og P10,000 ug ang makampiyon sa 5K Run, road bike ug mountain bike events makadawat og P7,000 matag usa.

Ang registration fee nagkantidad og P200 libre na ang singlet alang sa unang 600 ka registrants. Ang registration nagpadayon pa gihapon diha sa Cebu City Sports Center.

Ang Run and Bike for Freedom gipasiugdahan sa Cebu City Sports Commission uban sa suporta sa Cebu City Government ubos sa liderato ni Mayor Tomas Osmeña. – BANAT NEWS