CEBU, Philippines – Ang Ave Maria Sanctuary Park-backed University of San Jose-Recoletos (USJ-R) mibuntog sa Land Transportation Office (LTO) spikers sa lima ka sets aron pagsakmit sa labing unang korona sa Estaca Men’s Open volleyball tournament niadtong Sabado didto sa barangay Estaca sa Compostela, Cebu.
Ang Cebu Schools Athletic Foundation Inc. (CESAFI) men’s volleyball champion USJ-R, unang miangkon og daog, 25-19, apan ang LTO nakabawi sa second set pinaagi sa pag-iskor og 25-14.
Ang USJ-R mihimo og mga kausaban sa third set aron pagposte og 25-20 nga kadaugan ug alang usab sa ilang 2-1 nga bentaha.
Wala sab magpa-alkanse ang LTO dihang ila sab nga naangkon ang fourth set, 33-31 nga nakapugos sa duwa ngadto sa rubbermatch.
Nagbinurakay ang duha ka protagonista sa deciding game, apan ang USJ-R maoy mipatigbabaw pinaagi sa 20-18 decision.
Ang kadaugan sa USJ-R gipangulohan ni reigning 2009 Nestea Fit Beach Volley men’s national champion Ariel Carumba ug Loujei Tipgos, uban nilang Jacky Yrog-rog, Ken Abunda, Dave Aresa, Kevin Casia ug Jason Uy.
Ang LTO squad ni Edgar Catarungan ug Aden Belza gilangkuban nilang Jonrey Sasing, Norvie Labuga, Cliffors Café, Angellan Visoc, James Ryan Rivera, Ronald Melencion, Roy Ulan ug John Abas.
Sa duwa alang sa ikatulong dapit, ang John Patrick Caylo (JPC) squad mipilde sa University of San Carlos (USC) sa straight sets, 25-16, 25-23, 25-16.
Gawas sa tropeyo ug medalya, ang kampiyon nibulsa og P5,000, ang 2nd placer nakadawat og P3,000 ug ang third placer nakaangkon og P2,000.
Ang maong kompetisyon nga gipasiugdahan ni Jessie Yungco, usa
sa mga highlights sa tinuig nga kapistahan sa Santisima Trinidad, ang mahal nga patron sa barangay. – BANAT NEWS