Blue Eagles midagit og laing daog sa Friendship Cup

CEBU, Philippines – Nakahimo pa sa pagdagit og daog ang Ateneo de Manila University (ADMU) Blue Eagles human mi-aksiyon dihang giagak kini ni Eric Salamat sa himalatyong oras sa duwa.

Si Salamat, kanhi MVP sa San Sebastian Staglets, mi-iskor og singko sa iyang 11 puntos sa nanghinapos nga bahin sa duwa aron hungitan ang Eagles og 76-68 nga kadaugan batok sa Smart-Pampanga Buddies sa ikaduhang adlaw sa Friendship Cup basketball tournament kagahapon diha sa Cebu Coliseum.

Si Rabai al-Hussaini, kinsa wala matagbaw og duwa kagahapon tungod sa iyang sportsmanlike foul, maoy nangulo sa Eagles pinaagi sa iyang 21 puntos.

Ang maong kadaugan naglawog sa Eagles og 2-0 nga baraha ning maong torneyo ug posibleng makakuha kini og luna sa finals depensa sa resulta sa duwa tali sa CESAFI Selection (1-0) ug sa Cebu Landmasters (0-1) nga padayon pang nagduwa ning pagsulat.

Kun modaog ang CESAFI Selection nga gipangulohan ni June Mar Fajardo, makaangkon sila og katungod sa pakigsangka sa Eagles alang sa kampiyonato.

Si Christopher Sumalinog, miposa og duha ka triples nga naghatag sa Eagles og 30-29 nga bentaha sa halftime. Si Sumalinog miposa og laing tres sa nanghinapos nga bahin sa third period aron inaton ang labaw ngadto sa sayes puntos, 56-50 sa katapusang 27.3 segundos.

Si Al-Hussaini mi-iskor og 12 puntos sa ikatulong kuwarter, apan ang Pampanga wala mopakita og kaluya inay nanginit hinuon kini pinaagi sa paningkamot ni kanhi PBA star Niño Gelig, kinsa miposa og nuybe puntos.

Ang Smart-Pampanga padayong nanghagpat og mga puntos sa final period gawas sa daginutong oras sa duwa dihang si MVP Ryan Buenafe uban nilang Ricol Salva ug Jai Reyes mipatuasik og mga puntos.

Si Reyes, kinsa maoy nangulo sa ilang 83-69 nga kadaugan batok sa Landmasters niadtong miaging adlaw pinaagi sa iyang 23 puntos, milansang og 14 puntos, samtang si Buenafe miamot og nuybe puntos.

Ang Pampanga, kinsa wala pa makatilaw og daog sa duha ka duwa gipangulohan ni Gelig pinaagi sa iyang 18 puntos, gisundan ni Ford Arao nga adunay 14 puntos.

Puntos Matag Usa

Ateneo (76) - Al-Hussaini 21, Reyes 14, Salamat 11, Buenafe 9, Salva 8, Sumalinog 6, Baclao 2, Austria 2, Long 2, Chua 1

Pampanga (68) - Gelig 18, Arao 14, A. Espiritu 11, Vizcara 7, Al Espiritu 4, Luanzon 3, Saguindel 3, Alfad 2, Taylor 2, Baluyot 2, Nicdao 2 – BANAT NEWS