CEBU, Philippines - Nagmangtas sila si Ryan Villaver ug Jay Perez aron baswaton ang Orillaville quintet ngadto sa kulba-hinam nga kadaugan batok sa lig-on sab nga Rollyr Boyz sa iskor, 96-95 sa nagpadayong F. Llamas Youth Association (FYA) 1st Vice-Mayor Mike Rama Cup basketball tournament kaniadtong Huwebes didto sa Vicente Sotto Memorial Gym sa barangay Punta Princesa, ning dakbayan.
Si Perez maoy nahimong bayani dihang iyang napasulod ang iyang lay-up sa kataposang 12 segundos aron pag-iskor og 30 puntos alang sa Orillavile ug si Villaver mirehistro og 31 puntos.
Tungod sa maong kadaugan, ang Orillaville misakmit sa liderato sa Dark bracket bisan pa man tuod og nagtabla sila si Rollyr Boyz sa parehong 6-2 nga baraha apan maoy mipatigbabaw ang winner-over-the-other rule.
Ang Orillaville ug ang Rollyr Boyz nga gipang-iya ni Punta Princesa barangay captain Rolly Diorico segurado nang mi-abante ngadto sa semifinals nga sugdan karong Hunyo 21.
Ang ex-UC Junior Webmasters nga si Daniel Enriquez nga moduwa na'g balik sa UC isip collegiate player, maoy nangu sa Rollyr Boyz sa iyang 18 puntos samtang sila si Eking Marata ug Chissar Llegunas mi-iskor og 14 ug13 puntos matag usa kanila.
Sa laing duwa, ang kanhi USJ-R Baby Jaguar nga si Baeng Medalle mihagdaw og FYA record nga 43 puntos alang sa Viking Haulers lakip ang lima ka three-point shots aron pag-upset sa team sa iyang maguwang nga si Noel Medalle alang sa Kuya Allan sa iskor, 115-111.
Apan bisan pa sa maong kapildehan, ang Kuya Allan segurado na usab nga mosulod sa crossover semifinals tungod kay sila maoy lider sa Light bracket sa ilang gihuptan nga 5-3 nga baraha samtang ang Hauler aduna nay 3-5 nga baraha ug hapit na matagak.
Si Toper Limbaga mitampo og 34 puntos alang sa Haulers ug ang kanhi Jaguar nga si Giovanni Canceko miabuno og 17 puntos.
Si Ranel Patalita maoy nangu sa Kuya Allan sa iyang 33 puntos ug si Medalle mihakot og 25 puntos.
Ang kanhi lider sa Light bracket ang Heartfelt maoy nagsunod sa Kuya Allan sa ilang 4-3 nga baraha.
Ang top two teams sa matag bracket maoy mo-abante sa semifinals.
Ang torneyo sa FYA kanunay nga gitambongan nilang Punta Princesa barangay councilor Ray Gabriel Salgado ug ni tournament director Boy Atillo.
Puntos matag usa:
First Game:
Orillaville (96)— Villaver 31, Perez 30, Llegunas 17, Alceda 12, Trinidad 4,Brigola 2
Rollyr Boyz (95)—D. Enriquez 18, E. Marata 14, Lleguans 13, T. Marata 11, Basalo 10, Dela erna 8, Gallardo 8, J. Enriquez 6, Lantaca 4
Second Game:
Viking (115)—Medalle 43, Limbaga 34, Canceko 17, Cal 10, Aguirre 5, Cañete 4
Kuya Allan (111)—Patalita 33, Medalle 25, Marqueda 16, Quita 9, Canceko 6, Reubal 4, Rabadon 4. - Gabby G. Malagar (BANAT NEWS)