CEBU, Philippines – Nanghawod na sab ang Cebu Blue Marlins Swim Club ni coach Rolando Alvarez aron mapanalipdan ang ilang titulo sa CBM-Cebu City Sports Center Novice Swim Meet niadtong Domingo diha sa CCSC Aquatic Center.
Mi-okupar sa ikaduha ang Cebu Swimming Instructors Association, gisundan sa Villa Teresita Swimming Team.
Ang duha ka entrante gawas sa Sugbu nga mao ang Negros Oriental Blue Dolphins ug Dipolog Blue Marlins mitapos sa ikaupat ug ikalima nga dapit.
Nangu sa kampanya sa CBM mao si Virchar Bautista, kinsa miharos sa tanang unom ka bulawan sa 18-above class. Mipakita sab og maayong labok ang iyang kaubang babaye nga si Danica Camille Ramos, kinsa mihakot og upat ka golds, usa ka silver ug usa sab ka bronze.
Si Justin Daniel Junio, kinsa milangoy sa Mactan Channel duha ka tuig na ang milabay, mihakot sab og upat ka bulawan ug duha ka silvers sa boys 7-8 class.
Si Junio uban nilang Bautista, Joshua Rosada ug Federico Garganera, mao sab ang miwadwad sa CBM pagkutlo og bulawan sa 4x50m freestyle relay.
Laing mitunol og medalya alang sa CBM mao sila si Joebert Indaya nga miugkat og lima ka bulawan ug usa ka silver sa 6-under class, Timothy Gabriel Villabert nga adunay usa ka gold, duha ka silvers ug duha sab ka bronzes sa 9-10 category, Joshua Rosada nga mihakot og unom ka golds sa 11-12 division, Federico Garganera nga adunay tulo ka golds, duha ka silvers ug usa ka bronze sa 13-14 class ug si Adrian Joshua Tej nga mihipos og upat ka silvers ug duha ka bronzes sa 15-17 category.
Sa pikas bahin, si Schindlerie Villabert mitunol og duha ka golds ug tulo ka silvers sa 9-10 division, Theresa Lyn Chu nga mihakot og unom ka silvers sa 11-12 class ug si Kerien Aimer Alvarez nga milangkat og lima ka golds ug usa ka silver sa 15-17 category. – BANAT NEWS