Firebulls naka-una

CEBU, Philippines – Gibirahan sa Firebulls ang Poblacion-C, 88-78 aron pag-angkon og 1-0 bentaha sa Inter-Zonal “best-of-three” final series sa Mayor Edsel Galeos Cup 2009 summer basketball tournament didto sa Diosdado Macapagal Sports and Cultural Center sa Argao, Cebu.

Ang Firebulls igo lang naglabaw og uno punto sa halftime, 42-41, apan ang ilang mga puntos gikan sa fastbreaks sa nahabiling duha ka kuwarter maoy nagtuboy kanila pagposte og 10 puntos nga kadaugan.

Si Art Camello maoy nangulo sa Firebulls sa iyang 20 puntos, samtang si Ronie Salazar mihakot og 19 puntos lakip na ang lima ka triples. Sila si Ranelo Mamalias, Mark Puerto ug Zorro Oyanguren nagkumboya og 41 puntos.

Si Bobby Lopez milansang og 20 puntos aron pangulohan ang Poblacion-C.

Sa Inter-Town division, ang Carcar milubong sa Boljoon sa iskor nga 97-80 sa Game-1 sa ilang best-of-three series.

Ang Carcar nga gipangulohan ni Clifford Bargamento sa iyang 34 puntos milusad og 26-12 run sa final period aron paglansang og 17 puntos nga kadaugan.

Ang kanhi USC Warrior nga si Danny Infantado midugang og 22 puntos, samtang si Kent Florido miabuno og 14 puntos.

Sila si Bert Andujar ug Resty Getubig nagkumboya og 34 puntos aron pangulohan ang Boljoon. Si Andujar mipupo og 18 puntos, samtang si Getubig mikandos og 16 puntos sa maong kapildihan.

Sa sayo pa, ang Tulic-Lamacan midaog batok sa Cabalbotal sa iskor nga 85-71 aron pagsakmit sa ikatulong puwesto sa Inter-Zonal category.

Puntos Matag Usa

Unang duwa:

Firebulls (88) - Camello 20, R. Salazar 19, R. Mamalias 17, Puerto 14, Oyanguren 10, Papalid 2, Alburo 2, D. Salazar 2, T. Mamalias 2
Poblacion-C (78) - Lopez 20, Materolo 13, Pillaso 12, Tapere 12, Puerto 9, Crodua 5, Figuez 3, Alviso 2, Albarracin 2
Ikaduhang duwa:

Carcar (97) - Bargamento 34, Infantado 22, Florido 14, Tabar 8, Napolitano 8, Solon 7, Genayas 2, Alcover 2

Boljoon (80) - Andujar 18, R. Getubig 16, Nicanor 10, Tanato 10, Alinbango 8, K. Getubig 6, Sesaldo 4, Antiporta 2, B. Binagatan 2, Medida 2, I. Binagatan 2 – BANAT NEWS