SWU mipukan sa USC
CEBU, Philippines – Gipukan sa Southwestern University (SWU) belles ang University of San Carlos (USC) sa pagsugod sa 2nd Mayor Ritchie Wagas Volleyball Cup niadtong Domingo didto sa D.M. Reynes gymnasium sa Compostela.
Ang Joerem Yu-mentored SWU mipalukapa sa bag-ong pundok sa Carolinians sa duha ka sets, 25-20, 25-15.
Ang kadaugan sa SWU gipangulohan ni Elizabeth Emnace sa abag nilang Lorie May Layno, Danika Gendrauli, Raphril Aguilar, Shara Bulac, Luilyn Paciño, Danalie Baquiro, Rhea Loayon ug sa ilang mga newcomers nga sila si Crystali Picos ug Anna Bennova Sabanal.
Ang Lady Warriors wala makasustiner sa maong duwa kay kasagaran sa ilang mga magduduwa pulos bag-o ug mao pay pag-apil sa mga dagkung liga.
Naglangkob sa line-up sa Lady Warriors mao si Shakey’s Regional MVP Methosheena Bate uban nila ni Suzette Panis, Jeremy Montalvo, Niña Irish Cortes, Akemi Aono, Rachel Cumba, Angelita Ybañez, Chona Gesulga ug Mangelina Villaflores.
Sa laing bahin, ang Land Transportation Office (LTO) squad midaog batok sa reigning CESAFI women’s champion University of Southern Philippines Foundation (USPF), 25-16, 25-22.
Ang Team Catmon ug ang USPF high school team midaog sab pinaagi sa defaults.
Ang liga usa sa mga highlights sa tinuig nga kapistahan sa ilang mahal nga patron Señor Santiago de Apostol karong Hulyo 24-25. – BANAT NEWS
- Latest
- Trending
