CEBU, Philippines – Milangkat si Robbie Neil Enriquez og duha ka championship trophies sa 2nd leg sa OZ Racing Grand Prix Series 2009 niadtong Domingo didto sa Parkmall parking area sa north reclamation area.
Gidominar ni Enriquez ang expert open ug ang novice open categories.
Napuhalan ni Enriquez ang abilidad ni Gary Cañeda Jr. aron pagdaog sa titulo sa expert open, samtang sunod nga tulo ka luna nakuha nila ni Lyndon Requilme, opening leg winner Eduardo Burden ug Andie Ursal.
Si Requilme maoy ikaduha ni Enriquez sa novice open, samtang si Burden napunta sa ikatulo. Si Jerome Burden mipahiluna sa ikaupat , gisundan ni Niño Surban sa Danao City nga mikapyot sa ikalima.
Si Enriquez giubanan sa lain pang top performers nga sila si Keken Cabahug, Mario Borbon, ug Insik Flores.
Si Cabahug maoy naghari sa beginners 110 superstock, samtang si Borbon mi-okupar sa ikaduha, gisundan nilang Nelon Mayol, Jonel Intas ug Ranulfo Colina.
Hinuon, si Borbon nakabitbit sab og titulo human manghawod sa beginners 125 superstock. Si Jess Louie Vega midaog sa ikaduha. Mikompleto sa top five finishers mao sila si Cabahug, Mayol ug A. Morato.
Sa iyang bahin, si Flores mao sab ang nanghawod sa mix automatic open. Nalandig sa ikaduha si Mark Capoy, ang ikatulo nakuha ni Kenneth Ouano ug ang ikaupat ug ikalima nga dapit nadaog nilang Requilme ug E. Denape.
Gipasiugdahan sa OZ Racing Corp. pinaagi sa ilang presidente nga si Zandro Fajardo, ang five-leg race series gipaluyohan sab sa Yamaha Motors ug sa Norkis Trading Company. – BANAT NEWS