Magic kampiyon sa East

CEBU, Philippines - Human sa 14 ka tuig nga pinaabot, mibalik na sab sa NBA Finals ang Orlando Magic sa labing unang higayon gikan sa 1995 pinaagi sa pagpukan sa Cleveland Cavaliers sa iskor,103-90 atol sa Game 6 sa ilang Eastern Conference Finals didto sa Amway Arena sa Orlando, Florida.

Gitapos sab sa Magic ang mga pagduda kung kinsay mas maayo tali nila sa Cavs nga midaog og 66 ka duwa ug ingon man sa defending champion Boston Celtics nga pareho nilang gipalagpot.

Daw naghuramentado si Dwight Howard nga wala gyud mapugngi aron mohakot og 40 puntos alang sa Magic uban ang iyang 14 ka rebounds ug upat ka assists.

Mao kadto’y duwa nga tataw kaayong gidominar ni Howard si LeBron James kinsa maoy nangu sa Cavs sa iyang 25 puntos apan igo lang siyang mihimo’g pito ka rebounds ug pito sab ka assists.

Sulod pa lang sa naghinapos nga oras sa third quarter, daan nang gilupig ni Howard sa puntos si James—27 batok 18 ug dihang milabaw na og 21 puntos ang Magic, 91-70, diha pa motungtong sa 21 puntos ang iskor ni James.

Ang Magic kataposang mi-abante sa NBA Finals kaniadtong 1995 nga mao sab ang kataposang tuig nga nagduwa si Shaquille O’Neal kinsa mitapon didto sa Los Angeles Lakers nga iyang gitabangan nga mohakot og tulo ka korona sa NBA uban kang Kobe Bryant.

“I just think this team all year long has shown an incredible amout of heart. This team just keeps fighting back. They deserve it,” matud pa ni Magic coach Stan Van Gundy.

Ang Magic nakapasulod og 12 ka triples nga maoy ilang nagsilbing hinagiban batok sa kinatibuk-ang playoffs, upat niini gikan kang Mickael Pietrus kinsa mirehistro og 14 puntos ug tulo kang Rashard Lewis kinsa midugang og 18 puntos.

Si Rafer Alston kinsa miabuno og 13 puntos, mihimo’g tulo ka triples ug si Hedo Turkoglu may 10 puntos, duha niini ang three-point shots. Gilupig sab sa Magic sa iskor ang bench sa Cavs, 14-10 gumikan kang Pietrus.

Si Delonte West mi-abag kang James sa ilang opensa pinaagi sa pagtunol og 22 puntos samtang mi-iskor og 17 puntos si Mo Williams ug may 14 puntos si Anderson Varejao.

Ang Cavs nabiyaan og 18 puntos sa halftime, 58-40 ug samtang misipyat si James sa iyang drive sa wala pa matapos ang first half, gitawagan og technical foul si coach Mike Brown ug gihimo ni Lewis ang technical free throw pagsugod sa third period aron inaton ang labaw sa 19 puntos, 59-40.

Igo lang nakasikit ang Cavs ngadto sa 11 puntos nga biya human sa ilang 8-0 run pagsugod sa fourth period, 48-59 apan nagmangtas si Howard kinsa midominar sa ilawom ug ang iyang mga kauban nag-igo og maayo sa ilang outside shooting.

Dihang gamay na lang og oras ug nag-free throw si Howard, ang mga fans sa Magic misinggit kang Howard M-V-P aron palagoton si James.

Tungod sa pag-abante sa Magic, wala madayon ang gikahinamang Kobe-Lebron match-up ug ang nahisgotang match-up anha na lang makita sa mga tv commercials.

Samtang wala pa magsugod ang second half, nagpraktis og itsa si Howard sa free throw kay mao kini iyang angay palamboon ug samtang nagsige siya’g itsa-itsa, gibitad sa injured nga forward sa Cavs nga si Lorenzen Wright ang net aron kini mosipyat apan miuntol gihapon kini padulong sa sulod.

Matod pa, ang engkwentro sa Lakers ug Magic engkwentro sab sa Disney World batok sa Disneyland. Tua mahimutang sa Los Angeles, California ang Disney World samtang tua mahimutang sa Orlando, Florida ang Disneyland. — Gabby G. Malagar (BANAT NEWS)