CEBU, Philippines - Nasakmit og balik sa Rollyr Boyz ni team owner Punta Princesa barangay captain Rolly Diorico ang solong liderato human ilang gipukan ang Park ‘N Go Bakeshop sa iskor, 114-109 atol sa nagpadayong F. Llamas Youth Association (FYA) 1st Vice Mayor Mike Rama Cup niadtong Huwebes didto sa Vicente Sotto Memorial Gym sa barangay Punta Princesa, ning dakbayan.
Sa sayo pa, ang Kuya Allan naka-ipsot batok sa Criminal Intelligence and Investigation Bureau (CIIB) pinaagi sa pag-iskor og 113-111 nga kadaugan aron pahugtan ang ilang kampanya sa semifinal.
Si Daniel Enriquez mipabuhagay og 35 puntos aron pangulohan ang Rollyr Boyz kinsa naghupot karon sa solong liderato sa ilang 6-1 nga baraha ug si Chissar Llegunas midugang og 29 puntos.
Unom ka players sa Park ‘N Go mi-iskor og double figures alang sa Park ‘N Go nga gipangulohan ni Carl Rama kinsa mihakot og 21 puntos ug gisundan siya ni Dominic Enriquez sa iyang 19 puntos. Ang maong kapildehan naghatud sa Park ‘N Go ngadto sa kinaubsan sa ilang 0-7 nga baraha.
Nagkumboya sila si Noel Medalle ug Ranel Patalita alang sa Kuya Allan ug pareho silang miburak og 28 puntos ug si Jokjok Canceko midugang og 17 puntos.
Sila si Frankie Capangpangan ug Roy Veloso mi-iskor sab og 29 ug 28 puntos matag usa alang sa CIIB.
Ang Kuya Allan naghupot na karon og 5-2 nga baraha samtang ang CIIB midailos ngadto sa 3-3 nga baraha.
Ang kanunay nagpaluyo sa torneyo sa FYA mao sila si Punta Princesa barangay councilor Ray Gabriel Salgado ug tournament director Boy Atillo.
Puntos Matag Usa
Unang duwa:
Kuya Allan (113)—Medalle 28, Patalita 28, Canceko 17, Quita 11, Marqueda 10, Ylanan 8, Solon 4, Reubal 2
CIIB (111) - Capangpangan 29, Veloso 28, Ybañez 21, Plasus 15, Quita 12, Maucesa 4, Aldemita 2
Ikaduhang duwa:
Rollyr Boyz (114) —D. Enriquez 35, Llegunas 29, Caballero 24, T. Marata 8, E. Marta 6, Gallardo 2, Dela Cerna 2, Lantaca 2
Park ‘N Go (109)—C. Rama 21, Enriquez 19, Salinas 18, Camacho 15, Bas 14, T. Rama 10, Osorio 5, Lumapguid 3, Bucog 2. - Gabby G. Malagar (BANAT NEWS)