LEYC playoffs sugdan sab karon

CEBU, Philippines – Sugdan karon ang playoffs sa Lorega Echavez Youth Council (LEYC) basketball tournament uban sa 12 ka teams diha sa Lorega Sports Complex.

Lahi sa ubang mga liga, ang playoffs sa LEYC sugdan pinaagi sa parada uban sa semifinalists sa mini, midget ug juniors divisions.

Si Lahug barangay captain Mary Ann de los Santos maoy dinapit sa maong kalihukan.

Sugdan ang duwa sa alas-3 sa hapon diin ang Chris Lane makigharong sa Pitbulls sa bracket-A sa mini division, sundan sa engkuwentro sa Mat-Mat ug sa Phantom alang sa bracket-B.

 Sa midget division, ang no. 1 Carolinians moharong sa no. 4 Lomar Shaggy, samtang ang second seeded King Rafael makigkumbati sa Three Stars.

Mag-ilog usab sa luna sa finals sa juniors division ang top seed Christians batok sa 4th seed BSBYO, samtang ang 2nd seed LAYC makigsangka sa 3rd seed John Jacob. – BANAT NEWS