Saktong pasingot

Niadtong Lunes sa buntag, hapit ko dili kabarog gumikan sa grabeng pamaol. Mura'g gibunal-bunalan ang akong lawas. Niadto man gud Domingo, duha ka events ang akong gisalmotan sa labing unang United Architects of the Philippines (UAP) District C1 Sportsfest diha sa Cebu City Club-Cebu -- ang 3-on-3 basketball ug badminton.

Wala nako damha nga hapit diay magdungan ang iskedyul sa akong mga duwa. Mao nang paghuman nako og duwa og basketbol, modagan na sab dayon ko sa badminton court aron duyogan akong partner nga puwerte ra bang guwapaha nga si Archt. Moonyen Samson. Kun wa pa lang ko'y duwa sa basketbol, maglisud gyud ko'g biya sa maanyag kaayo nakong kauban. Hehehe.

Bitaw sa kinatibuk-an, kaunom ko nakaduwa og basketbol kay nakasud man ang akong team sa finals ug katulo sa badminton. Sa tinuoray lang, mismo ako dili makatuo sa kondisyon ug sa enerhiya nga gipuga sa akong lawas niadtong tungora. Kuwang na lang magdala ko'g tangke sa oxygen aron makasustinir ko sa tanan nakong mga duwa.

* * *

Apan gibaliwala nako ang kakapoy kay nalingaw man sab ko sa akong gibuhat. Misamot na nga nagbunga ang gipaulan nakong singot kay nakapugnit man mi og silver medal sa 3-on-3 basketball kauban sa akong teammates nga sila si Criz Matunog ug Vincent Sesbreño.

Usa lamang ako sa pipila ka sakop sa media nga gi-imbitar ni UAP District C1 director Archt. Alan G. Choachuy ug tournament chairman Antonio 'Jay-R' Decatoria, Jr. aron mosalmot sa ilang torneyo nga eksklusibo unta sa mga arkitekto.

Ang uban mao sila si Sir Rick G. Gabuya, Jonas Panerio, Lito Tecson ug Kristen Marie 'Iste' Sesante sa Cebu Daily News, ug ang suod nakong higala nga si Erwin Lirazan sa Sun.Star Superbalita. Ang akong gikahimuot ug ikapasigardo nga kaming tanan nakadaog og medalya ug usa lamang kanamo ang wala makasud sa finals sa events nga among gisalmotan.

Sa gikaingon ko na, naka-silver ko sa 3-on-3 basketball apan nangu sa naglagiting nga kalampusan sa mga sports media mao sila si Bay Erwin Lirazan ug Jonas Panerio. Si Erwin nakabulawan sa 9-ball billiards, samtang si Panerio maoy nanghawod sa 3-point shootout ug ingon man sa 2-ball contest. Si Sir Rick naka-silver sa bowling, samtang si Bay Tolits naka-silver sab sa badminton. Si Iste Sesante, sa iyang bahin, nakasingit sab og bronze medal sa badminton. Congratulations kanatong tanan!

* * *

Duna diay ko'y gamay'ng butang nga ipaambit sa mga kauban nako sa buhat. Pipila man gud ka higayon nga nabalita nga si boxing superstar Manny Pacquiao mo-anhi sa Sugbu himan-himan nahug diay ngadto sa wala. Una sa Mayo 18 o 22. Human gisibog kini ngadto sa Mayo 25 hangtud nga giuswag na sab ngadto sa Mayo 27. Sa katapusan, way Pacman nga mibutho dinhi sa atong tugkaran. Mao nang dili gyud ko mangahas pagsulat og petsa kanus-a si Pacquiao mo-anhi dinhi kay matud pang Sir Wakee Salud, hangtud nga dili pa makasakay og eroplano si Pacquiao, wa pay klaro ang iskedyul niiini.

* * *

Kun dunay mga reaksiyon o pangutana, mahimong mo-email sa [email protected]