Sonsona bag-ong WBO flyweight champion

CEBU, Philippines – Hinay-hinay nga nikulit og ngalan sa natad sa boksing ang garbo sa General Santos City nga si Marvin 'Marvelous' Sonsona human iyang gipatug si kanhi world champion Wandee Singwangcha sa second round aron masakmit ang WBO Oriental flyweight title sa ilang away niadtong Huwebes sa gabii diha sa Cebu Coliseum.

Ang 18-anyos nga si Sonsona mihapos sa iyang makusog nga uppercut   hinungdan nga milup-og ang Thai.

Mibanat dayon si Sonsona pagsugod sa engkuwentro diin mibuhi kini og makalipong nga kombinasyon ngadto ni Singwangcha, kinsa naugtas og panagang.

Wala mag-usik og panahon si Sonsona mibuga kini sa iyang makabungog nga suntok aron pagtumba sa bisitang boksidor sa ikaduhang hugna. Wala na moharong pa si Singwangcha, kinsa naglisod og barog ug gitaoran oxygen kay naglisud og ginhawa.

Sa maong kadaugan si Sonsona misaka ngadto sa 12-0, 11KOs, samtang si Singwancha natagak ngadto sa 57-11, 12KOs nga rekord.

Sa main event, si Ramie Laput (38-3, 20KOs) milampos sab sa pagdepensa sa iyang WBO Intercontinental junior featherweight title pinaagi sa disqualifications batok sa beteranong si Ratanachai Sor Vorapin (74-12, 49KOs) dihang namatid kini atol sa maong away.

Sa round 11 sa ilang away, gipaulanan ni Laput ang Thai kinsa nagkadugo tungod sa gisi sa ilong. Sa iyang kadismaya sa pagpangatake sa Pinoy, kalit lang namatid si Vorapin nga maoy nakapaaghat sa mga officials nga undangon ug ihatag ni Laput ang daog via disqualification.

Milampos sab si Johnreil Casimiro pagpukan ni Arden Diale pinaagi sa 8th round TKO aron mapanalipdan ang iyang WBO Asia-Pacific jr. flyweight title.

Sa undercard, nakatilaw sa labing una niyang pilde si Anthony 'Rocky' Marcial (14-1, 13KOs) dihang gipatumba siya ni Jack de Asis (12-11-2, 8KOs) sa 1:29 sa third round, samtang si Jason Egera nidaog pinaagi sa split decision batok ni Petch Kokietgym sa Thailand. – BANAT NEWS