Nelly's Farm mipupo na gyud og daog sa Power Forty

CEBU, Philippines – Nakatilaw na gyud og daog ang Nelly’s Farm human ilang gipilde ang Ave Maria Sanctuary Park, 73-63 sa Power Forty President’s Cup Summer League didto sa Inayawan Sports Complex.

Sa unang duwa, mikulit na sab og laing daog ang www.fedguns.ph batok sa Water Market sa iskor nga 68-61.

Wala kapugngi sa iyang pagmangtas si Carding Vernaiz, kinsa mihakot og 28 puntos aron pangulohan ang Nelly’s Farm. Laing tulo ka players ang miwadwad sab og maayo aron pagkulit og double figures. Si Epe Reyes mi-iskor og 13 puntos, si Titing Moniva midugang og 12 puntos ug si Eddie Gabuya miabuno og 10 puntos.

Bisan pa sa maong daog, ang Nelly’s Farm nahimutang gihapon sa kinailawman sa team standings sa ilang 1-5 nga baraha.

Ang Ave Maria nga nahimutang sa ikaduhang dapit sa ilang 4-2 nga baraha gipangulohan ni Inayawan barangay councilor Mario Tabar   pinaagi sa iyang 17 puntos, gisundan ni Jun Felicitas nga adunay 15 puntos.

Sa sayo pa, wala sab mapiog si Cogon-Pardo councilor Jojo Ibones, kinsa miposa og 20 puntos aron pangulohan ang www.fedguns.ph nga nagbitbit og 3-3 nga baraha.

Si Zaldy Dumale mi-iskor og 20 ug si Vez Eleguin mikulit og 16 puntos alang sa Water Market.

Puntos Matag Usa

Unang duwa:

www.fedgun.sph (68) -Ibones 20, Cabañero 11, Rosal 10, Rabadon 8, Javierto 7, Mabalcon 4, Abadejos 3, Ramil 3, Villoga 2

Water Market (61) - Dumale 20, Eleguin 16, Dela Rama 10, Yosores 3, Dejacto 3, Abellana 3, Genzon 2, Dacalos 2
Ikaduhang duwa:

Nelly’s Farm (73) - Vernaiz 28, Reyes 13, Moniva 12, Gabuya 10, Sabejon 4, Albaño 4, Nuñez 2

Ave Maria (63) - Tabar 17, Felicitas 15, Mosqueda 12, Abasolo 6, Fuentes 4, Kalinga 4, Labajo 3, Navares 2 – BANAT NEWS