Aqua Serve nakabawi

CEBU, Philippines – Nakabawi ang Aqua Serve Purified Water gikan sa ilang kapildihan dihang ilang gipahimungtan ang Viking Haulers, 85-81 sa 1st F. Llamas Youth Association (FYA) Vice Mayor Mike Rama Cup basketball tournament didto sa Vicente Sotto Memorial Gym sa barangay Punta Princesa, ning siyudad.

Sa sayo pa, ang Jayra squad milubong sa Park N’ Go Bakeshop ni team owner Romy Rama sa iskor nga 95-84.

 Si Christian Villacastin mibahog og 26 puntos ug si Tito Bacarisas miposte og 22 puntos alang sa Aqua Serve, kinsa malaumon nga makakuha’g lingkoranan sa semifinals.

Ang Viking Haulers gipangulohan ni Giovanni Canceko ug Baeng Medalle nga nagkumboya og 38. Si Norman Luague midugang og 14 puntos ug si Shun Cal mi-iskor og 13 puntos alang sa Viking, kinsa nakatilaw sa ilang ikalimang pilde sa pito ka duwa.

Sa laing bahin, si Clark del Mar miburak og 29 puntos aron pangulohan ang Jayra, samtang si Beking Rollon mi-iskor og 16 puntos. Sila si Porky Pacaña ug Poloy Aglipa mitampo og 14   matag usa.

Si Kevin Camacho maoy nangulo sa Park ‘N Go sa iyang 26 puntos, gisundan ni Carl Rama kinsa mi-iskor og 14 puntos.

Ang FYA gipaluyohan sab ni Punta Princesa barangay captain Rolly Diorico, barangay councilor Ray Gabriel Salgado ug tournament chairman Boy Atillo.

Puntos Matag Usa

Unang duwa:

Jayra (95) - Del Mar 29, Rollon 16, Pacaña 14, Aglipa 14, Ylanan 9, Zapanta 9, Basco 2
Park ‘N Go (84) - Camacho 26, C. Rama 14, Enriquez 13, Lumapquid 8, T. Rama 5, Bas 5, Salians 2
Ikaduhang duwa:

Aqua Serv (85) - Villacastin 26, Bacarisas 22, Navarro 17, Bahina 6, Garcia 6, Sensuntec 4, Franklin 2, Avila 2
Viking (81) - Canceko 20, Medalle 18, Luague 14, Cal 13, Trinidad 8, Potenciano 4, Cambarijan 2 – BANAT NEWS