Mendel, De Los Santos nanghawod sa Running M.A.D.

CEBU, Philippines - Gikoronahan isip unang hari ug reyna sila si Mendel Lopez ug Mary Grace De los Santos dihang mikampiyon sila sa tagsa-tagsa nila ka kategoriya sa “Running M.A.D for wellness” kagahapon diha sa University of the Philippines Visayas-Cebu College grounds.

Ang beteranong si Mendel Lopez maoy nag-una sa 12K Mens Opens sa iyang oras nga 42.36:10, gisundan siya sa nikampiyon sa miaging Run for Sight nga si John Phillip Dueñas nga mipahulina sa ikaduhang dapit sa oras nga 45.21:57, samtang si Sherwin Managil nga mitapos sa lumba sa oras nga 46.50:98 maoy nisakmit sa ikatulong dapit.

Lakip sa mga nakasulod sa top 10 sa Mens Open mao sila si Reprinel Banzon, Robert Daang, Elmo Clarabal, Jude Rivera, Emerson Trazo ug Elvin Ray Fernandez.

Sa Womens Open, ang pambato sa Zamboanga City nga si Mary Grace De los Santos, kinsa maoy kampiyon sa miaging MILO Marathon Cagayan de Oro leg, nipakita na usab sa iyang kapaspas dihang mirehistro siya og oras nga 52.42:92, samtang ang second placer nga si Madelyn Carter nirehistro og 56.54:23. Nipahiluna sa ikatulong dapit mao si Joery Lee sa iyang oras nga 57.01:78.

Mikumpleto sa top 10 sa Womens Open mao sila si Annie Netic, Marina Lipardo, Veronica Ong, Haidee Acuña, Rosan Trane ug Aster Nebasa.

Sa 6K Division, ang produkto sa University of the Philippines Foundation (USPF) nga si Joel Delposo maoy nanghawud sa Mens Open sa oras nga 21.38:09, nagsunod kaniya sila si Meljun Luterte (21.41:17) ug Jorry Ycong (21.59:75) nga mipwesto sa ikaduha ug ikatulong dapit.

Si Miscelle Gilbuena (27.39:31) mao usab ang nikampiyon alang sa Womens Open uban nila ni Crizel Diongson (30.09:30) ug Gerlyn Rose Baylon (39.38:49) isip second ug third placer. – BANAT NEWS