Cobras mitukob korona sa Rudy Espinosa Cup

CEBU, Philippines – Mihunat og maayo ang Southwestern University (SWU) Cobras sa fourth period aron pagposte og 79-76 nga kadaugan batok sa CCC-CSD Builders ug ingon man pagtukob sa korona sa open division sa 1st Vice Mayor Rudy Espinosa Cup basketball tournament niadtong Miyerkules sa gabii didto sa nagsugwak nga Barba Sports Complex sa dakbayan sa Toledo.

Kulba kaayo ang kumbati sa duha ka koponan ug walay nasayod kun kinsa ang modaog ilabi na nga si Raul Redulosa yano kaayong mipasulod sa iyang duha ka free throws aron pagsikit sa iskor, 76-77 sa nahabiling 32 segundos sa dili pa mahurot ang oras sa duwa.

Si Eric Zanoria maoy miluwas sa Cobras pinaagi sa pag-ilog sa inbound pass ug yano kaayo milusot dayon paghuni sa buzzer.

Si Zanoria maoy nangulo sa Cobras pinaagi sa iyang 26 puntos, 14 niini gikan sa first period.

Mipakita sab sa iyang katakus si Aard Diango ug mi-iskor kini’g 13 puntos alang sa Cobras.

Sa maong kadaugan, ang Cobras mibulsa og P70,000 ug   silver cup gikan ni Vice Mayor Rudy Espinosa.

Si Aldrin Ocañada mao sab ang nangulo sa Builders nga mipabuto og 22 puntos. Sila si Franklin Nailon ug Danny delos Santos nagkumboya og 32 puntos alang sa Builders kinsa mibulsa og P50,000.

Ang ikatulo nga dapit nakuha na sa Ave Maria Sanctuary Park/USJ-R Jaguars human gipilde ang Asian College of Technology (ACT) Cyber Knights.

Ang Rudy Espinosa Cup nagsilbeng usa sa mga kalingawan alang sa tinuig nga kapistahan ni San Juan de Sahagun, ang mahal nga patron sa dakbayan sa Toledo karong Hunyo 11-12.

Si city councilor Jun Borja, kinsa maoy nipaluyo sa preliminary game nga giulohan og “Battle of Badings,” ug tournament director Estoy Jaranilla, miabag ni Vice Mayor Espinosa pagtunol sa mga ganting salapi ug mga tropeyo ngadto sa mga mananaog.

Puntos Matag Usa

SWU (79) - Zanoria 26, Diango 13, Gallarde 9, Poligrates 9, Armecin 8, Jalandoni 6, Belande 4, Litorja 2, Pacquiao 2
CCC-CSD (76) - Ocañada 22, Nailon 19, Delso Santos 13, Jaca 8, Abobo 6, Abatayo 4, Redulosa 2 – BANAT NEWS