CEBU, Philippines – Nakalingkawas ang AMBL Enterprises and Advertising ni team owner Allan Lim sa makutas nga kumbati pinaagi sa pagposte og 95-87 batok sa Ginga Hot Mocha Mix aron paglangkat sa korona sa Basketball Association of Ramos (BAR) Vice Mayor Mike Rama Cup 2009 First Conference didto sa Benjamin Solon Memorial Gym sa barangay Cogon- Ramos, ning dakbayan.
Ang AMBL milabaw og siyete puntos sa halftime, 48-41, apan dihang ilang gipatuman ang mas hugot nga depensa, hinay-hinay nga miinat ang labaw ug miabot ngadto sa 10 puntos, 71-61 paingon sa final quarter.
Ang Ginga Mocha nga katapusang nakatilaw og labaw, 18-15 sa sayong bahin sa first period, mi-rally pag-usab, 80-82 sa katapusang 2:40 sa duwa luyo sa mga paningkamot nilang Erik Viagedor ug Glen Birao, apan gipakgang kini nilang Robert Abasolo, Lito Navarro ug Yokyok Alesna aron luwason ang AMBL.
Si Abasolo, kinsa maoy nidaog sa MVP award maoy nangulo sa AMBL pinaagi sa iyang 26 puntos. Si Navarro midugang og 20 puntos, samtang si Alesna miamot og 13 puntos.
Si Birao, kanhi produkto sa CTS Scanner, maoy nangulo sa Ginga sa iyang 17 puntos, gisundan ni Erwin Ferrer sa iyang 15 puntos.
Sa kumbati alang sa ikatulong dapit, ang Jan Hog and Cattle Dealer midaog batok sa inilog nga McMill Enterprises ni Macky Hapitan sa iskor nga 95-84.
Si Louie Navarro maoy nangulo sa Jan Hog Dealer pinaagi sa iyang 23 puntos lakip na ang usa ka buzzer-beating shot sa midcourt nga maoy nagtapos sa first half. Si Jimbo Noel mi-iskor og 21 puntos alang sa Jan Hog .
Ang McMill gipangulohan ni Danny de la Peña, kinsa mipabuto og 22 puntos, gisundan ni Bebot Ancot sa iyang 18 puntos.
Si league sponsor ug acting Cebu City Mayor Michael L. Rama, BAR president Emot Salcedo ug finance officer Richard Regidor maoy mitunol sa ganting salapi, mga tropeyo ug mga medalya ngadto sa mga mananaog.
Puntos Matag Usa
Unang duwa:
(For 3rd place)
Jan Hog (95) - L. Navarro 23, Noel 21, Regidor 16, Reyes 12, Abatayo 8, Leopats 6, Villaber 4, Cobacha 3, Libre 2
McMill (84) - Dela Peña 22, Ancot 18, Miano 14, Secuya 9, Cabarrubias 6, Tumulak 6, Tecson 2, Hapitan 2, Albia 2, Apa 2, Reynes 1
Ikaduhang duwa:
(Championship)
AMBL (95) - Abasolo 26, Navarro 20, Alesna 13, Jumamil 10, Monreal 8, Sullano 6, Lim 6, Piñas 2, Quiroz 2, Feliciats 2, Gallway 2
Ginga Mocha (87) - Birao 17, Ferrer 15, Galo 11, Viagedor 11, G. Navarro 10, Ernie 8, Salcedo 8, Limpangog 6, Ompad 1 – BANAT NEWS