CEBU, Philippines – Giila nga labing hawod si Junjun Burden sa 1st Honda One-Make Race nga gipasiugdahan sa OZ Racing niadtong Domingo didto sa Parkmall sa north reclamation area.
Si Burden sa Kamigawa Racing midominar sa expert open category human gipilde si Niño Surban sa BFC Cyclone sa Danao City nga nalandig sa ikaduha.
Mi-okupar sa ikatulo nga dapit si Gary Cañeda, samtang si RJ Manlise sa Bradz Racing ug si Andoy Sanchez sa Club Motorista mitapos sa ikaupat ug ikalima nga dapit.
Uban ni Burden sa podium mao sila si Juno Villena, Juval ‘Buyog’ Abellar, Lyndone Requilme ug Gary Cañeda.
Si Villena sa Team Honda maoy nag-una sa super beginners category. Gisundan ni Adrian Morato sa Kamigawa Racing ug ni Consiso Cañeda.
Ang ikaupat nga dapit nakuha ni Joseph Plantar, samtang ang mikapyot sa ikalima mao si Renato Sala sa Team Cyrus.
Si Abellar sa Team Motofix maoy nidaog isip best racer sa beginners 110cc.
Mi-okupar sa ikaduha hangtod sa ikalima nga dapit mao sila si Adrian Morato sa Kamigawa Racing, Ranulfo Colina sa Pidot Racing Team, Villena sa Honda ug si Julius Cabrera sa Moto Trekker.
Si Requilme sa Team MAC maoy naghari sa beginners 125cc. Si Dan Condeno sa Team Motofix nalandig sa ikaduhang dapit, gisundan ni David Tan sa BFC Cyclone-Danao, Rommel Paz ug Wenmart Salde.
Dobleng kadaugan ang naangkon ni Requilme dihang iyang gidominar ang Inter-Club Team Race. Sila si Villena ug Macky Sakmar sa Honda mitapos sa ikaduha, samtang sila si Math Cenarlo ug Eugene Cafe sa MTM miangkon sa ikatulo. Ang ikaupat nga dapit nakuha nila ni Rene Sala ug JR Sanchez sa Team Cyrus ug ang mikapyot sa ikalima mao sila si Teodorico Caballes ug Estefanio Barbac Jr. sa URBC.
Si Gary Cañeda misakmit sab og titulo sa novice open. Si Surban mitapos sa ikaduha, gisundan ni Requilme, RJ Manlisa sa Bradz Racing Team ug Enrique Adol sa Pidot Racing Team.
Mitunol sa ganting salapi, medalya ug plake ngadto sa mga mananaog mao si OZ Racing President Zandro Fajardo ug Honda Motor World Inc. general manager Jose Daniel ‘Jonel’ Borromeo. – BANAT NEWS