CCC-CSD daug batok cobras sa game 1

CEBU, Philippines - Naunhan sa CCC-CSD Builders ang mas batan-on apan undermanned nga Southwestern University (SWU) Cobras pinaagi sa pag-iskor ug 78-69 nga kadaugan sa Game 1 sa best-of-three finals sa 1st Vice-Mayor Rudy Espinosa Cup basketball tournament kaniadtong Biyernes sa gabii didto sa Barba Sports Complex sa Toledo City.

Gipruyba ni Jared Kane Abatayo nganong angayan siyang ilhon nga usa ka top defensive guard ug gawas pa niana iya sab gipakita ang iyang opensa tungod kay ang kanhi sakop sa UC Webmaster maoy nangu sa opensa sa Builders pinaagi sa paghakot ug 15 puntos.

Samtang nagpakita sab sa ilang katakos ang mga beterano nga sila si Jerry Jaca ug Franklin Nailon, ang pag-ayuda ni Sherwin Abobo kinsa mi-amot ug 12 puntos, maoy isa sa labing daku’g natabang kay iyang mga puntos maoy kanunay mitubag matag panahon mo-iskor ang Cobras sa transition. Si Abobo nga bag-o lang migradwar isip sakop sa CIT Wildcats sa miaging CESAFI season, usa ka prize-catch alang ni team consultant Romy Cal.

Sila si Jaca ug Nailon midugang sab ug 13 ug 11 puntos samtang si Aldrin Ocañada mi-iskor ug 10 puntos alang sa Builders kinsa kinahanglan na lang modaug ugmang adlawa aron maangkon ang P/70 mil pesos nga ganting salapi alang sa first prize.

Si Cal miangkon hinuon nga dili sayon pildehon ang cobras kung nakaduwa pa ang ilang tulo ka pambato nga sila si Alfred Belande, Eric Zanoria ug Eliud Poligrates.

Si Ard Diango maoy nangu sa Cobras pinaagi sa paghipos ug 15 puntos samtang si Jeff Pria mitunol ug 13 puntos. Si Rene Pacquiao miabuno ug 11 puntos ug si Ritchie Jalandoni midugang ug 10 puntos.

Ilogan karong gabii sa Ave Maria-USJR Jaguars ug sa Asian College of Technology (ACT) Cyber Knights ang ikatulong pwesto.

Ang Rudy Espinosa Cup gidumala nila ni Toledo City councilor Jun Borja ug tournament director Estoy Jaranilla ug ingon man ni Edwin Dejacto isip sakop sa technical committee.

Puntos matag usa:

CCC-CSD (78)— Abatayo 15, Jaca 13, Nailon 11, Ocañada 10, Delos Santos 9, Redulosa 3, Arnado 3, Sayson 2

SWU (69)— Diango 15, Pria 13, Pacquiao 11, Jalandoni 10, Litorja 8, Armecin 6, Caytona 4, Albarillo 2. - Gabby G. Malagar (BANAT NEWS)