CEBU, Philippines – Sa katapusan, ang Asian College of Technology (ACT) Cyber Knights namiyembro na sa club of champions.
Kini human ang Cyber Knights ni coach Tata Merced milubong sa Asian College of Science and Technology (ACSAT) Lightnings sa Dumaguete City, 102-71 nga maoy ikatulong koponan
nga milangkat sa korona sa Visayas Amateur Athletics Association (VAAA) men's basketball dili pa dugay didto sa Minglanilla Sports
Complex.
Sa second quarter pa lang, nahibaw-an na ang dagan sa duwa kay gilubong man og maayo sa ACT ang bisitang ACSAT.
Ang ACT Cyber Knights miposte og 23 puntos nga labaw, 74-51 paghuman sa ikatulong kuwarter ug ang nakapait kay wala mopakita og diyutay'ng pagbabag ang ACSAT hinungdan nga mitubo og maayo ang labaw ngadto na sa 31 puntos paghuman sa kumbati.
Si Elmer Aparice maoy nangulo sa ACT nga miburak og 24, samtang si Adelbert Nuñez midugang og 19 puntos. Sila si Prospito Batiancila Jr. ug Cyril Pontemayor nagkumboya og 30 puntos.
Si team owner ug Cebu City Councilor Rodrigo 'Bebot' Abellanosa mapasigarbuhon kaayo sa kalamposan sa iyang koponan ug mihatag kini og victory party alang sa iyang mga magduduwa sa usa ka beach resort sa dakbayan sa Talisay.
Puntos Matag Usa
ACT (102) - Aparice 24, Nuñez 19, Batiancila 17, Pontemayor 13, Conahap 9, Valencia 7, Cadiz 6, Reyes 4, Doy 2
ACSAT (71) - Tuanda 13, Quintao 13, Villanueva 12, Quiñones 11, Concua 6, Nillas 5, Dela Cruz 5, Ada 4, Catubay 3 – BANAT NEWS