Kumbati na

CEBU, Philippines – Buhian na ni ALA Stable stalwart AJ ‘Bazooka’ Banal (18-1-1, 15KOs) ang nagbaga niyang mga kumo batok ni African ‘Golden Boy’ Mbawana Matumla (18-3-1, 10KOs) sa Tanzania nga maoy main event sa “Pagsubok” boxing card karong gabii diha sa Cebu Coliseum.

Ang 20-anyos nga si Banal wala maka-away dinhi sa Sugbu sukad nalukapa sa ika-10 ka round ngadto ni Panamian Rafael ‘El Torito’ Concepcion atol sa ilang WBA interim superflyweight championship niadtong Hulyo 27 sa miaging tuig diha gihapon sa Coliseum.

Hinuon, si Banal nakabawi sa maong kaparotan pinaagi sa fourth round knockout batok ni Indonesian Nouldy Manakane atol sa iyang pagkatkat og balik sa ring niadtong Enero 31 didto sa Island City Mall sa Tagbilaran City.

Dili lang buot mopukan ni Matumla, si Banal kinahanglan sab nga mopakita og impresyon aron ipamatuod nga angayan siyang hatagan og oportunidad nga maka-away sa undercard sa away nilang Floyd Mayweather Jr. batok ni Juan Manuel Marquez karong Hulyo 18 didto sa Las Vegas.

Sa supporting bouts nga gi-presentar sa ALA Promotions sa pakig-alayon sa higanteng TV network ABS-CBN, si kanhi WBO Asia-Pacific super featherweight king Czar Amonsot ug reigning WBO Youth lightweight champion Jason Pagara andam na sab nga mopahugyaw sa ilang mga dumadapig pinaagi sa ilang nagpungasi nga mga suntok.

Si Amonsot (19-3-1, 11KOs) makigpinaksitay ni Kenyan jr lightweight title-holder Morsis Chule (11-6-2, 8KOs), samtang si Pagara makigbinukbukay ni Indonesian welterweight ruler Hero Katili.

Lain pang mopakita’g aksiyon mao si Jun Intor sa Mabinay, Negros Oriental batok Leonard Guardiano sa Bacolod City, si Marjohn Macahilig sa Kalibo, Aklan batok Francis Lee Cutanda sa Tagbilaran-based Harada Stable, si Rocky Amonsot sa Tagbilaran batok Evelino Valleser sa Jimdomar Stable sa Ubay, Bohol, samtang si Reynaldo Boctot sa Cebu City mopakita sa labing unang away isip pro batok ni Samuel Galinato sa Elaba Stable sa Jagna, Bohol. – BANAT NEWS