Hiroshi sud semis sa CAFC

CEBU, Philippines – Gisirohan ni team Hiroshi ang linghod nga Inter-Cebu FC, 5-0 aron mopalandong sa men’s open semifinal round sa 9th Cebu Amateur Football Club (CAFC) National Inter-Club Football Cup diha sa University of San Carlos Technology Center (USC-TC) football field sa barangay Talamban, ning siyudad.

Ang Hiroshi mipasulod sa tanan nilang lima ka goals sa first half kortesiya nilang Arnie Pacinabo, Ryan Lirio, Jan Michael Flores, John Paul Arrangeuz ug Christian Joy Delan.

Tungod sa dakung labaw, nahukman nga ipatuman ang “mercy rule” aron ang nahabiling oras mapahimuslan alang sa laing duwa.

Tataw kaayo ang Inter-Cebu dili makapiog sa Hiroshi nga gilangkuban sa mga kanhi ug bag-ong mga sakop sa nasudnong koponan sama nilang Arnie Pacinabo, Peter Amores, Jan Michael Flores ug Frederick Alasas.

Ang Hiroshi gikatakdang makigsangka sa Queen City United karong adlawa. Daog o pilde ang Hiroshi segurado na nga makasulod sa semis tungod sa ilang 4-0-1 win-loss draw record.

Sa sayo pa, ang University of Cebu-ERCO nga gipangulohan ni RP Team member Robert Canedo miposte og 5-2 nga kadaugan batok sa San Roque Football Club.

Ang UC-ERCO uban sa Queen City United, Philippine Army ug Bohol padayon pa nga nanikaysikay alang sa lingkoranan sa semis.

Sa 38-above class, ang miabante sa sunod nga hugna mao ang CQU-A, SRFC ug Hiroshi. Ang QCU-B ug Armymen magtigi alang sa katapusang luna sa semis.

Didto sa San Roque Parish field, and Davao milubong sa CIT-Mandaue, 12-0 sa boys 17-under group B.

Ang Don Bosco Technology Center nag-una sa boys 17-B class, samtang ang Springdale mao sab ang nangulo sa group A. – BANAT NEWS