CEBU, Philippines – Gisangyaw sa giilang African ‘Golden Boy’ Mbwana Matumla sa Tanzania nga andam na siya nga makigbugno ni ALA Stable standout AJ ‘Bazooka’ Banal karong Sabado sa main event sa “Pagsubok” diha sa Cebu Coliseum.
Namurit pa si Matumla nga mas maayo pa siya itandi ni legendary boxing icon Oscar De la Hoya, ang orihinal nga “Golden Boy” sa boksing.
“I’m a good boxer. I’m better than De la Hoya,” matud pa sa kanhi IBO super flyweight champion dihang gipangutana sa mga sakop sa media og nganong gitawag siyang “Golden Boy,” atol sa pre-fight conference kagahapon didto sa Patio Isabel restaurant.
Si Matumla, kinsa adunay 18-3-1, 10KOs, nagkanayon nga andam siya sa taas nga away ibabaw sa ring batok ni Banal, apan dili siya magpanuko nga mopatumba sa ALA boxer kun hatagan og higayon.
Daku usab ang pagsalig sa manager ni Matumla nga si Emmanuel Mlundwa nga mopatigbabaw ang iyang boksidor batok ni Banal. Bisan og non-title, mahinungdanon gihapon ang away alang nilang Matumla ug Banal.
“After this fight, we will defend the ICB title,” matud ni Mlundwa, obviously referring to Matumla who is the reigning International Circuit Boxing (ICB).
Sa iyang bahin, si Banal magsagubang og lisud nga tahas ug kinahanglan nga modaog siya aron maka-away kini sa undercard sa Floyd Mayweather Jr.-Juan Manuel Marquez showdown karong Hulyo 18.
Si ALA Promotions president Michael Aldeguer una nang nikonpirmar nga si Banal gipasaligan ni Golden Boy Promotions vice president Eric Gomez ug international matchmaker Sampson Lewkowicz nga malakip sa undercard sa away nilang Mayweather ug Marquez kun modaog kini batok ni Matumla.
Sa supporting bouts, nipasalig og usa ka nindot nga away ang Kenyan nga si Morris Chule batok sa laing ALA mainstay nga si Czar Amonsot, samtang ang Indonesian nga si Hero Katili makigbinukbukay usab ni reigning WBO Youth lightweight champion Jason Pagara.
Ang final press conference himuon karong alas-11:00 sa buntag diha sa Cebu Grand Hotel, samtang ang official weigh-in himuon ugma sa SM City-Cebu Entertainment Center sa alas-11:00 sa buntag. – BANAT NEWS